Sunog duol sa Inayawan landfill, 30 ka balay ugdaw
CEBU, Philippines — Laing sunog ang miulbo sa Dakbayan sa Sugbo niadtong Domingo sa gabii diin 30 ka mga panimalay ang hingpit nga naugdaw sa may White Road, Barangay Inayawan.
Nadawat sa kabomberohan ang alarma sa sunog, alas 6:46 sa gabii, giisa nila kini sa second alarm alas 7:13, nakontrolar alas 10 sa gabii ug hingpit nga na fire-out alas 5:18 na sa buntag kagahapon.
Matud ni FCIns. Noel Nelson Ababon, ang fire marshall sa siyudad nga nagsugod ang kayo sa panimalay ni Alex Ybiernas, diin nagbilin kini dili momenus P200 mil. Ila pa sab nga gisuta kon unsay hinungdan sa sunog. Sumala ni Ababon, milanat og pipila ka oras ang ilang overhauling kay lakip nga nasunog ang mga basura diin ila kining gisiguro og palong aron dili na makakatap og maayo.
Subay niini, paningkamutan sa Division for the Welfare of the Urban Poor (DWUP) nga makabalik og tukod sa ilang mga panimalay ang mga nasunogan human masayri nga uban nagpuyo sa pribadong luna.
“Sa part sa DWUP sa amoa mao na mo-intervene mi as to ownership sa property. Hangyuon ang lot owner nga as much as possible makabalik atong mga pamilya nga nagpuyo diha”, pamahayag sa operations chief sa DWUP nga si Genevieve Alcoseba.
Samtang si Inayawan Barangay Captain Kirk Bryan Repollo nagkanayon nga susihon pa nila kon gamiton ba sa tag-iya ang lugar nga nasunog ug iya usab giklaro nga wala tuyoa og sunog kini taliwala sa mga pasangil. “Although naay nanggawas nga istorya gituyo kuno, which is ato lang na i-clarify, wala na tuyoa ug wala mag-apil-apil ang tag-iya ana diha karon so far”, sumala pa ni Kap Repollo.
Iya usab gipahibawo nga nakadawat na og hinabang ang mga nasunugan gikan sa Cebu City Hall. Hinuon nagkinahanglan pa ang mga biktima og mga personal nga mga gamit.
“Mga basic necessities then kanang mga ligo gyud nga sabon, shampoo mga ingon ana kay sa mga senina hinuon naa man tay medyo na stock diri katong nangayo sad og mga hinabang sa taga Inayawan para sa katong nasunugan sa ubang lugar ba...” dugang sa kapitan. Giklaro sab ni Kap Repollo nga dili ang landfill maoy nasunog, aduna lay residential area nga duol sa landfill nga adunay junkshop nga maoy gikaon sa kayo. (Decemay P. Padilla/DILT)(BANATNEWS)
- Latest
