Duha patay sa aksidente
CEBU, Philippines – Patay ang usa ka motorista ug grabe usab nga naangol ang angkas niini dihang nadumbolan sila sa mini dump truck nga nagkarga og balas sa eskina A.C. Cortes Avenue ug dalan P. Burgos sa Barangay Alang-Alang, Dakbayan sa Mandaue alas 11 pasado ang takna sa miaging adlaw.
Si Police Officer 1 Ryan Bintoy nga field investigator sa traffic division sa Mandaue City Police Office (MCPO) miila sa namatay nga mao si Jonh Ian Alexis Caberte, 23, lumad nga taga Carmen, Bohol apan nagpuyo sa Barangay Calawisan, Dakbayan sa Lapu-Lapu. Samtang ang angkas nga si Carlo Dominic Teruel, 33, taga Barangay Basak sa Dakbayan sa Lapu-Lapu ang nakaangkon og grabeng kadaut sa iyang tiil ug ubang bahin sa iyang kalawasan nalandig sa Mandaue City Hospital.
Ang drayber sa mini dump truck nga nakadumbol mao si Lanmar Latesa Tolin, 21, taga Barangay Tapon, Dalaguete kinsa giingong walay lisensiya sa pagmaneho.
Matud pa ni Bintoy ang ulo ni Caberte nalatayan sa ligid sa nakadumbol kanila ug patay na pag-abot sa tambalanan. Ang duha padung sa Lapu-Lapu City dihang nahitabo ang aksidente.
Samtang patay ang 46-anyos nga si Ma. Belmalen Ysao, human kini nabangga sa prime mover samtang padung na kini pauli gikan sa disco nga kabahin sa selebrasyon sa Valentine’s Day sa Lungsod sa Dalaguete.
Samtang ang gisakyan niini nga motor gimaneho ni Anecito Ramos, 23, taga Sitio Cangbangyao sa maong lungsod. Matud pa ni Senior Police Officer 1 Rodrigo Teo, imbestigador sa Dalaguete Police Station nilabang sa highway si Ramos hinungdan nga nabangga kini sa prime mover nga gimaneho ni Jose Estrabela, 45, nga nagbiyahe gikan sa Santander padulong sa Siyudad sa Sugbo.
Sumala pa ni Teo, nalagpot si Ysao ug naligsan sa ligid sa maong trak. Si Estrabela gitanggong sa kapolisan ug nagpaabot pa sila sa plano sa pamilya sa namatay kun mopasaka og kaso samtang si Ramos anaa karon sa tambalanan. (Rowena Capistrano/IBM)(BANAT NEWS)
- Latest
