P365 mil nadala sa tulisan gikan sa negosyante

CEBU, Philippines – Mokabat ngadto sa P365,000  ang nadala sa mga tulisan kinsa mga armado ug nagsakay og motorsiklo gikan sa usa ka negosyante kagahapon sa kadlawon diha  sa Barangay  Pagsabungan,  Dakbayan sa Mandaue.

Si  Senior  Police Officer  2  Alin Carado sa Presinto 3  sa Mandaue  City Police Office (MCPO)  miila sa biktima nga mao si Rey Yonson Villarin, 42–anyos, tag-iya og tindahan sa inihaw nga mga manok sa nahisgutang lugar.

Matud ni Carado nga gikan pa sa ilang panimalay ang biktima ug naglakaw kini padulong sa iyang tindahan nga nagdala sa dakong kantidad sa kwarta nga ibayad unta niini sa delivery nga inihaw nga mga manok. Samtang naglakaw ang biktima kalit kining gihunongan og motorsiklo ug ang angkas niini kinsa naghupot og armas nideklarar og tulis.

Gikuha sa maong tulisan ang bag sa biktima nga gisudlan sa kwarta ug ang drayber sa motorsiklo nagpabulhot sa pagpadagan pahilayo sa maong dapit.

Ang kapolisan nagpahigayon og follow-up operation sa maong hitabo. (/BDB)(BANAT NEWS)