Kampanya magsugod na
CEBU, Philippines — Magsugod na og panguyab sa mga botante karong adlawa Pebrero 12 ang mga kandidato alang sa pagka senador ug party list representatives.
Adunay 63 ka mga kandidato sa pagkasenador ang mag-ilog sa 12 ka mga pwesto aron makompleto ang 24-member nga Senado samtang 134 ka mga party list groups usab ang naninguhang makalingkod sa House of Representatives.
Kini maoy hinungdan nga paspas na sa Commssion on Elections (Comelec) ang pagpangandam sa umaabot nga piniliay karong Mayo 13. Nunot niini si Rafael Olaño, direktor sa Comelec-7 miingon nga sugdan na sunod semana ang pagbansay sa mga magtutudlo nga magsilbing poll clerks ug mga election canvassers ug ang pagplastada sa mga polling precincts. Nagpahigayon na usab sila og demonstrasyon bahin sa paggamit sa Vote Counting Machine aron matudloan ang mga botante.
Si Anna Fleur Gujilde, election officer sa Dakbayan sa Mandaue miingon nga ang VCM nga ilang gipresentar sa mga tawo sulod sa usa ka mall sa dakbayan dad-on ngadto sa nagkalainlaing dapit sa Sugbo alang sa pag-demonstrate sa publiko unsaon kini paggamit.
Naobserbahan ni Gujilde nga nagpanagana ang mga tawo pagduol sa VCM bisan pa man adunay mga paggiya sa mga personnel sa Comelec. Gipasabot ni Gujilde sa mga tawong nagtan-aw ang proseso sa pagbotar nga magsugod sa pagpangita sa ilang polling precincts ug hangtod na pagpasulod sa balota ngadto sa VCMs.
Sa pikas bahin, ang Comelec magsugod na og panangtang sa mga campaign posters sa mga kandidato nga wala sa mga designated areas nga giila sa Comelec ug nilapas sa gidak-on.
“Actually within 72 hours the law presumed that the law gave the statutory notice (sa mga kandidato),hilabina katong gi-hang illegally,” matud ni acting Provincial Comelec Officer Jerome Brillantes.
Base sa guidelines ang size limit nga 2x3 feet o 3x2 feet lang ang gidak-on sa campaign materials subay sa Republic Act No. 9006 o Fair Elections Act.
Giklaro niyang ang mamahimo ra nilang tangtangon ang sa mga posters sa mga national candidates pagkakaron.
Ang mga lokal nga kandidato makapatuyang pa og papilit sa ilang mga posters kay wala nay gitawag karon nga premature campaigning. (BANAT NEWS)
- Latest