Duha ka opisyal sa Mambaling nagtinubagay

CEBU, Philippines — Sayo sa buntag kagahapon miabot ang mga tinugyanan sa Cebu City Accounting Office ug representante ni Mayor Tomas Osmena sa Mambaling Barangay Hall alang sa ipahigayon nga barangay inventory apan milanat lang kini og pipila ka oras, human ubay-ubay sa mga buhatan sa barangay hall nga naglakip sa buhatan sa kapitan, secretary ug treasurer ang gikandaduhan, rason nga wala kini masusi ug milakaw sab si suspended barangay captain Gines Abellana.

Matud ni acting Kapitan Anne Marie Vestil-Palomo, ang barangay inventory usa ka tinuig nga bulohaton ug kay Pebrero na ug wala pa sila nakahimo sa inventory, hinungdan nga iya kining gihimo. Ug kay suspendido ang kapitan kinahanglang masayran ug makita ang kwarta sa ilang panudlanan lakip na ang ilang financial documents.

Sumala pa ni Palomo, kapila na siya nangayo sa secretary sa ilang mga resolutions apan walay dokumento nga gihatag hinungdan nga nihimo nalang siya og paagi pinaagi sa maong inventory apan kutob lang sa ilang makita ang ilang nasuta kay walo ka mga kwarto sa barangay hall ang sirado.

Gitug-an niini nga daghang dokumento nga gipirmahan ni Abellana ang wala na hatagi og bili.

Dugang ni Palomo nga sibil ang tinagdanay nila ni Abellana ug kay dili naman mo sa ilang level hinungdan nga nanginahanglan na sila og intervention.

Paingon na mag-udto kagahapon dihang naabot si Abellana ug nahitabo ang sinukliay og mga pulong tali nila ni Palomo, atubangan sa katawhan ug mga sakop sa media.

Matud ni Abellana, walay authority si Palomo gikan sa Department of Interior and Local Government ug sa buhatan ni Presidente Rodrigo Duterte diin siya miapelar sa iyang suspension. Dugang niya nga dili siya motugot sa inventory kay walay authority si Palomo niini. Hinuon andam ra siyang mosunod niini kon adunay mga tinugyanan sa DILG ug tukma ang proseso. (BANAT NEWS)