Tinun-an nalatayan sa bus

CEBU, Philippines — Usa ang patay samtang unom ang nangaangol sa nahitabong tulo ka mga aksidente sa kadalanan dinhi sa Sugbo.

Niadtong Sabado sa hapon, patay ang usa ka batang tinun-an sa grade 9 human malatayi sa bus diha sa Barangay Abugon, Lungsod sa Sibonga.

Giila ang biktima mao si Rikka Kasandra Samaco ,15 anyos, residente sa maong dapit. Matud pa ni Senior Police Officer 3 Antonio Sanchez,  nagbisekleta ang maong bata paingon unta mouli gikan sa barangay hall sa maong dapit.

Giingong nagsubay pidpid sa National Highway ang biktima sa dihang nasaghiran kini sa Son Man Bus nga gimaneho ni Joel Flores ,40, kinsa padung sa Simala.

Matud pa napasok ang ulo sa bata sa pangulahiang ligid ug nalatayan kini.

“Mountain bike ang gisakyan sa bata, makita ra unta kay habog man. Naa ra baya unta siya nagsubay sa daplin sa dalan nasaghiran gihapon,” sigun sa maong polis.

Patay na pagabot sa tambalanan sa Dakbayan sa Carcar ang bata samtang Flores mitahan sa kapolisan sa Sibonga.

Samtang naangol ang duha ka mga drayber og traysikol drayber dihang kalit nga giharos  sa pagdasmag sa Toyota Vios nga awto nga gimaneho sa usa ka police official  diha sa Sitio Laray, Barangay Cansaga, Lungsod sa Consolacion  niadtong Sabado sa hapon.

Si  Police Officer 2  Saturnino Inoc sa Consolacion Police Station  miila sa mga naangol mao sila si Dian Rudy Sarip ug Jimmy Quinapondan Hudaya.

Matud pa ni PO2 Inoc ang nakadasmag kanila mao si Police Senior Inspector   Dante Baguio kinsa gikan pa sa Public Safety Training Center sa maong dapit.

Matud nawad-an og kontrol sa manobela si Baguio ug nadasmag sa nag-parking nga mga traysikol diin naglingkod ang tagsa-tagsa ka mga drayber. Ang duha daling gidala sa tambalanan.

Sa laing aksidente, unom sab ka mga tawo ang nalandig sa tambalanan human sa disgrasya sa may National Highway, Barangay Guibuangan, Lungsod sa Barili niadtong Sabado sa gabii dihang nagkabangganay ang usa ka mini dump truck ug multicab.

Ang mini- dump truck gimaneho ni Terso Monteza, 43, taga Barangay Manlapay sa Lungsod sa Dumanjug. Samtang ang multicab gimaniho ni Sulficio Cañete, 43anyos, taga Barangay Pawa, Dumajug.

Ang mga naangol naglangkob mao sila si Rolito Costales; Wilfredo Oman; Edwin Clata, 35; Ken Terenio, 25; Jimmy Peteluna, 42, ug Elmer Librando, 26.

Matud pa ni Police officer 3 Mark Anthony Fat, Desk Officer sa Barili Police Station base sa imbestigasyon sa ilang imbestigador padulong sa Dumanjug si Monteza gikan sa Poblacion Barili samtang si Cañete, gikan Dumanjug padulong sa Poblacion.

Pag-abot sa lugar diin nahitabo ang disgrasya nikawat og lugar ang multicab hinungdan maayo niini nga pagkasampak sa gikasugat nga trak hinungdan sa pagkaangol sa mga sakay sa multicab ug nalandig tambalanan sa Dakbayan sa Sugbo.

Samtang ang driver sa trak gitanggong sa kapolisan samtang nagpaabot sa pagpasaka sa kaso batok kaniya. (BANAT NEWS)