Linog nasinati sa Sugbo

CEBU, Philippines — Naukay ang mga Sugbuanon human sa nasinati nga pagtay-og mga alas 7:55 sa gabii niadtong Biyernes, diin 5.9 magnitude ang natala sa Philippine Institute of Volcanology and Seismology (PHIVOLCS).

Gitataw sa PHIVOLCS nga tectonic ang gigikanan sa maong linog diin ilang nasuta nga ang  epicenter niini didto mahimutang sa  General Luna, Surigao del Norte.

Basi sa ilang talaan ang Intensity V nasinati sa Surigao City; Intensity IV sa Gingoog City; Intensity III sa Cagayan De Oro City, Boronggan City ug Cebu City; Intensity II sa Catbalogan City; Intensity I sa Kidapawan City, Lapu-Lapu City, Argao, Alabel ug Sarangani.

Bisan og Intensity III ang nasinati sa Sugbo, matud sa PHIVOLCS nga kusog-kusog gyud ang pagtay-og kay namatikdan man kini sa mga tawo ang kalit nga paglihok sa ilang mga butang.

Gani ang mga nakatagamtam sa pagtay-og nakapaukay sa mga netizens gumikan sa ilang mga posts sa social media.

Wala hinuoy natala nga kadaut sa dakbayan atol sa maong pag-uyog. (Romeo T. Limpangog/DILT)(BANATNEWS)