Call center agent namaligya og ecstasy

CEBU, Philippines – Arestado ang 24-anyos nga call center agent human kini nakuhaan og 15 ka mga tabletas sa ecstasy sa mga sakop sa Philippine Drug Enforcement Agency -7  diha sa Villalon Drive, Barangay Capitol Site ning Dakbayan sa Sugbo sa miaging gabii.

Ang nasikop mao si Elvin Joseph Laput, taga Barangay Guadalupe ning dakbayan. Matud pa sa Regional Director sa PDEA7  Wardley Getalla natultolan nila si Laput pinaagi sa impormasyon gikan sa mga nagkadaiyang night clubs sa dakbayan.

Matud niya nga kauban ang mga operatiba sa kapolisan ilang gitutokan ang pagsubay sa mga tinubdan niining ecstasy human nga nanggawas nga report nga gipamaligya na kini dinhi.

Gibutyag ni Getalla sa night clubs sa siyudad sila nakakuha og impormasyon bahin ni Laput hinungdan sa gihimo nilang operasyon.

Matud niya napalitan kini sa mga operatiba og 15 ka tabletas nga mobalor og P25,500.

Si Laput sa iyang bahin, nitug-an nga napugos nalang siya sa pagdala sa maong butang tungod kay kinahanglan niyang mokita kay palayason na siya sa iyang gipuy-an tungod sa balayronon niyang P4 mil.

Matud niya una niya kining higayon nga nakabaligya og ecstasy ug gisugo ra siya pagbaligya niini sa tawong wala niya pangalani. (/IBM)(BANAT NEWS)