CCLEC nakakuha og P19B nga loan alang sa CCLEX

CEBU, Philippines – Dili na mabalaka ang Cebu Cordova Link Expressway Corporation (CCLEC) tungod kay nakakuha sila og P19 billion term loan aron mo-finance sa nahibiling balayronon sa construction sa Cebu-Cordova Link Expressway (CCLEX).

Gipahigayon kagahapon sa buntag ang signing ceremony diha sa Pacific Grand Ballroom sa Waterfront Hotel and Casino, Dakbayan sa Sugbo diin gitambongan kini sa mga representante sa CCLEC, representante sa unom ka bangko, opisyales sa kagamhanan sa Siyudad sa Sugbo ug Lungsod sa Cordova.

Ang Cebu Cordova Link Expressway Corporation nipirma og 15-year omnibus contract ug security agreement tali sa Rizal Commercial Banking Corporation, Development Bank of the Philippines, Robinsons Bank Corporation, Union Bank of the Philippines, Bank of the Philippine Island ug Security Bank Corporation.

Ubos sa pagtugot sa kagamhanan sa Dakbayan sa Sugbo ug Lungsod sa Cordova ang CCLEC mo-construct, manag-iya ug mo-operate sa 8.5 kilometer toll bridge nga dunay total project cost nga P30 bilyones.

Nagsugod ang construction niini niadtong Hulyo 5, 2018 diin ang tanang 21 piles sa main bridge tower 2 nakompleto na samtang 17 sa 21 ka piles sa tower 1 ang gipatindog.

Ang presidente sa CCLEC ug general manager Allan Alfon masaligon nga ang construction sa CCLEX makompleto sa tunga-tunga sa tuig 2021.

Ang CCLEC usa ka subsidiary sa Metro Pacific Tollways Corporation (MPTC) nga pinakadako nga toll road developer sa nasud.

Dugang niini, si MPTC president ug chief executive officer Rodrigo Franco nibutyag nga unom ka financial institutions ang nakaabot sa final list sa arrangers ug lenders.  (/BDB)(BANAT NEWS)