P5.8M nga evacuation center giinugurahan sa Kapitolyo

CEBU, Philippines – Giinugurahan na ang P5.8 milyones nga multipurpose evacuation center nga gitukod sa Probinsiya sa Sugbo diha sa Lungsod sa Sibonga.

Ang Kapitolyo nagtinguha kini sa pagtukod og 10 ka evacuation center diha sa kalungsuran diin ang maong proyekto ang una nga nahuman.

Matud ni Wilson Ramos, sa Provincial Disaster Risk Reduction and Management Office (PDRRMO) nga masulod sa maong evacuation center ang 70 ngadto sa 100 ka mga tawo.

“Multipurpose evacuation center among tawag ana kay if ever walay calamity pwede mahimong training center or magamit nga metinganan ba”, matud ni Ramos.

Gipadayag ni Ramos nga takubo ang style sa desinyo sa maong evacuation center diin ang kusog nga ulan mobanda lang niini.

Ang maong evacuation center aduna usab kini mga kwarto ug pansayan sa sulod.

Ang PDRRMO ni-identify kini og mga lungsod nga tukoran og evacuation center diin gisugdan na ang mga lungsod sa Sta. Fe, Madridejos, Carmen ug Pilar.

Samtang laing target nga tukoran mao ang mga lungsod sa Ronda, Badian, Alcoy, Pinamungajan ug Tabogon.

Si Gobernador Hilario Davide, III ug Bise Gobernador Agnes Magpale maoy nangulo sa maong inugurasyon kagahapon.

Apil usab nga gi-ground break ang 6-storey building sa provincial hospital sa Dakbayan sa Carcar nga modugang sa bed capacity sa maong tambalanan gikan sa 50 ngadto sa 150 ug gibana-bana nga moabot ngadto sa P111.5 milyones ang budget niini. (/BDB)(BANAT NEWS)