Talisay nabulit sa tarpaulin sa mga politiko?

CEBU, Philippines – Sama sa ubang mga lugar sa Sugbo nabulit usab sa mga tarpaulin sa mga kandidato sa umaabot midterm election sa buwan sa Mayo ang Dakbayan sa Talisay.

Nabantayan nga bisan asa nga suok sa barangay sa siyudad makita na ang dagkong pangalan ug dagway sa mga politiko nga adunay pagtimbaya gikan sa adlaw sa mga kalag ug Santos, pasko, bag-ong tuig, Sinulog ug Valentine’s Day.

Ang uban ilis-ilasan lang ang greetings apan mao ra gihapon ang tarpaulin ug dagway sa mga kandidato.

Hinuon ang maong gibuhat sa mga politiko walay kalapasan sa balaod apan ang lokal nga Comelec gikatakdang mopadala og suwat aron ipahinumdum sa mga kandidato nga adto lang nila kini ibutang ang ilang tarpaulin sa mga designated area.

Matud ni Atty. Gallardo Escobar nga gidili ang pagbutang sa ilang propaganda sa mga kahoy ug uban pang lugar nga wala sa lagda.

Ang national nga kandidato gidid-an na sa pagbutang og tarpaulin sugod sa Pebrero 12 samtang petsa 29 sa buwan sa Marso ang lokal nga kandidato.

Ang dili motuman sa hangyo sa Comelec giingong ipatawag kini. (/BDB)(BANAT NEWS)