Palace of Justice pangayuon sa Kapitolyo

CEBU, Philippines — Nagplano karon si Gobernador Hilario Davide III nga mopadala na sab og sulat ngadto sa Korte Suprema aron nga hangyuon kini nga ihatag na lang sa Kapitolyo ang naguba nga Palace of Justice nga anaa sa Capitol compound.

Kini human nga ang Dakbayan sa Sugbo ug ang Korte Suprema nagpinirmahay og kasabutan alang sa pagdonar sa kagamhanan sa siyudad og 1.5 ka ektaryang luna sa South Road Properties.

Kahinumduman nga niadtong tuig 2013 ang Chief Justice Marcelo Fernan Hall of Justice nga anaa sa Capitol compound usa sa mga edipisyo nga naguba human miigo ang 7.2 magnitude nga linog sa Central Visayas.

Nahimutang sa Palace of Justice kaniadto ang mga regional trial courts, municipal trial courts ug uban pa nga justice offices, apan tungod sa linog, gipabakante na ang ikaduhang andana ngadto na sa ika-upat ug nahabilin na lang karon ang Cebu City Prosecutor’s Office sa ground floor.

Si Davide una na kining mihangyo sa Supreme Court (SC) sa panahon ni kanhi Chief Justice Maria Lourdes Sereno nga angkunon na lang sa Kapitolyo ang naguba nga Palace of Justice aron nga ipaayo kini ug butangan sa mga buhatan sa Kapitolyo.

Apan walay nakuha nga tubag ang Kapitolyo gikan sa SC.  Sa pagkakaron anaa sa Qimonda IT Center sa North Reclamation Area nag opisina ang mga korte ug naghulat na lang nga matukod ang bag-ong edipisyo sa SRP.

“Ako na ifollow-up, atong tan-awon kon mosugot ba sila, ang bag-ong chief justice ron, atong sulatan” matud ni Davide. (/DILT)(BANATNEWS)