Mama nibugaw sa mga anak gidakop

CEBU, Philippines — Tulo ka mga bata lakip ang tulo ka semana nga masuso ang naluwas gikan sa online sexual exploitation human nasikop kagahapon sa hapon ang 32-anyos nilang inahan nga giingong nibaligya kanila pinaagi sa online trafficking  diha sa Lungsod sa Alcantara.

Ang mga sakop sa Women and Children Protection Center-Visayas Field Unit miingon nga apil sa naluwas ang pag-umangkon sa suspek. Matud pa nga gigamit sa suspek ang 13-anyos niini nga anak pinaagi sa pagbugaw kaniya ngadto sa mga langyaw bugti sa salapi pinaagi sa internet.

Giingong ang inahan nipadala og hulagway sa mga anak ngadto sa langyaw online sugod niadtong Nobiyembre. Sugod niadto gipanid-an na ang iyang modus.

Dihang nakumpirmar ang iyang dautang binuhatan ngadto sa mga bata gilusad dayon ang operasyon ug kini gidakop kagahapon.

Ang operasyon pinasikad sa search warrant gikan ni Judge Ramon Daomilas. Apil sa subject sa warrant ang balay sa iyaan niini sa Lungsod sa Ronda  diin atol sa maong pagsusi nakita ang mga resibo sa money transfer receipts nga nagpakita sa transaksyon sa suspek ngadto sa mga langyaw. Ang operasyon gihimo sa  Anti-Cyber Crime Group-7  tinabangan sa mga sakop sa Cebu Provincial Police Office Special Weapons and Tactics, Ronda Municipal Police Station’s Women and Children Protection Desk, Alcantara Municipal Police Stations, DSWD 7 ug International Justice Mission (IJM).

Matud pang Atty. John Tanagho, IJM Cebu Field Officer Director ang maong kalamposan pasidaan sa mga online traffickers. Ang IJM nitabang pagkasikop sa 184 ka online traffickers diin 54 na ang nakombikto,  429 ka bata ang naluwas sugod tuig 2011. (BANAT NEWS)