100 balay naugdaw

CEBU, Philippines — Gibanabanang lapas 100 ka mga panimalay ang naugdaw sa duha ka sunog nga niulbo sa Dakbayan sa Sugbo ug sa Dakbayan sa Talisay kagahapong adlawa.

Sa sunog sa may Sitio Tabok-Canal, Barangay Pardo sa Dakbayan sa Sugbo gikatahong nagsugod kini sa panimalay ni Mario Tabura, apan ipaubos pa sa kabomberohan sa imbestigasyon ang hinungdan sa sunog.

Nadawat sa kabomberohan ang alarma sa sunog alas-8:59 sa buntag nga nakontrolar pasadp alas-10 na sa buntag

Matud pa ni Chief Inspector Noel Nelson Ababon, Fire Marshall sa Dakbayan sa Sugbo, naglisod gyud sila  tungod kay sudlonon kaayo ang dapit nga nasunogan.

Dugang pa ni Ababon, adunay tulo usab ka tawo ang naangol human nangapaso atol sa sunog nga sila si Christian Jade Solonia, Mario Tabura ug Renedic  Solonia.

Sumala pa ni Ababon nagsikit-sikit ang mga balay sa maong dapit ug sagad ginama sa gaay nga materyales hinungdan nga dali kaayong nikatap ang kalayo.

Gibanabanang mokabat sa P1.2 milyon ang danyos sa maong sunog. Dugang pa ni Ababon, posibleng mosaka ug posibleng mokubos ang gidaghanon sa mga balay nga apektado tungod kay nag-imbentaryo pa ang Department of Social Welfare and Services sa mga nasunogan.

Atol sa kaguliyang kagahapon, ang mga nasunogan anha nagtapok sa basketbolan nga walay atop. Gipaabot nga ibalhin og covered court ang mga biktima kagabii.

Sa laing sunog nga nahitabo sab sa Barangay Tanke sa Dakbayan sa Talisay, 60 ka mga panimalay ang hingpit nga naugdaw  sumala pa sa kabomberohan.

Nadawat sa kabomberohan ang sunog ala- una pasado ug gibutang dayon taskforce alpha ug hingpit nga na fire out pasado na alas 4 sa hapon.

Matud pa ni Senior Inspector Arra Alfajarro, Fire Marshall sa Dakbayan sa Talisay nagsugod ang sunog sa balay ni Nerresa Bacalso apan wala pa masayri kun giunsa pagsugod ang sunog.

Kalab-anan sa mga panimalay ginama sa light materials. Gihimakak sab ni Alfajarro nga dunay na trap nga mga bata kay nakit-an na kini sa mga tagtungod. (BANAT NEWS)