Unom ka barangay sa Minglanilla maapektohan sa expressway

CEBU, Philippines – Unom ka barangay sa Lungsod sa Minglanilla ang maapektohan unya sa tukuron nga Metro Cebu Expressway nga gisugdan na sa unang hugna diha sa amihanang bahin sa Lalawigan sa Sugbo.

Si Concordio Mejias, municipal administrator sa maong lungsod nibutyag nga karong tuiga masugdan na ang maong proyekto nga magsugod sa amihanang bahin diin moagi kini diha sa ilang lugar hangtud sa Dakbayan sa Naga.

Ang maong proyekto motadlas sa mga bukirang barangay sa Minglanilla nga gilangkuban sa Guindaruhan, Cadulawan, Vito, Manduwang, Cuanos ug Tubod.

Matud ni Mejias nga ang Metro Cebu Expressway mao’y usa sa mga tubag nga mokunhod ang kahuot sa trapiko sa ilang lugar.

Ang Lungsod sa Minglanilla usa sa mga lugar sa habagatan nga reklamohan sa mga motorista gumikan sa kahuot sa trapiko sa lugar.

Matud usab ni Mejias nga gilaumang aduna na unya’y kalamboan sa ilang ekonomiya kon ang proyekto mapatuman na kini.

“Ma alegre na pod ang kubikiran. Unya sayon na sab sa mga mag-uuma ang ilang pagtumod sa ilang mga pananom diha sa merkado”, Dugang ni Mejias. (/BDB)(BANAT NEWS)