Banay’ng Labitad nabalaka sa ilang seguridad

CEBU, Philippines — Gibati og tumang kabalaka ang mga paryente sa notadong kriminal nga si Jerome Labitad kini human ang ilang mga pangalan nalakip sa listahan sa kapolisan.

Nasayran nga sa labing uwahing hitabo, si Labitad, Felix Abacajan Jr. ug laing usa ka lalaki nga wala pa mailhi, nakigpinusilay sa mga sakop sa Provincial Intelligence Branch sa Cebu Provincial Police Office (CPPO) niadtong Martes.

Matud pa ni konsehal Jeaneth Quiamco sa Brgy. Campo 4 sa Siyudad sa Talisay nga midangop kanila ang mga paryente ni Labitad human sila nakakita sa balita nga ilang pangalan nalakip sa grupo sa ilang ig-agaw.

Si Fernando Labitad, barangay tanod nagkanayon nga dili gyud siya mahimutang hasta ang iyang pamilya sa pagkakita nila sa balita. Asoy pa niya nga nagtinarong gyud siya sa iyang pagka-tanod ug wala mag apil-apil sa kalihukan sa iyang ig-agaw.

Si Andrico Labitad miingon nga wala siyay gibuhat nga dautan sa iyang pagkatawo.

“Nakahuna-huna ko nga motago ko kay basin unya og unsaon ko. Pero nakahuna-huna pud ko nga nganong motago man ko nga wala man koy sala,” asoy pa ni Andrico.

Laing midangop sa kapolisan mao si Elesardo Labitad kinsa mitago gyud sa kalibunan human siya gipangita sa mga polis kay lagi didto mitago si Jerome sa ilang pinuy-anan human sa nahitabong engkwentro.

Samtang ang asawa ni Bernaldo Labitad maoy mipresentar kay ang iyang bana tua man sa Negros.

Usa sab ka Florencio Sabella nga maoy nalahi og apilyedo apan dili iglayo sa mga Labitad ang mipatim-aw aron limpyohan ang iyang pangalan.

Si konsehal Quiamco nagkanayon nga ang ilang pagkuyog sa ilang mga konstituwenti tinarong basi sa ilang alegasyon nga wala sila malambigit sa ginadiling drugas o unsa man nga ilegal.

Samtang si PSupt. Marlu Conag, hepe sa kapolisan sa siyudad mitataw nga iyang gitambagan ang lima nga mas maayo nga adto sila sa CPPO kay dili man sila maoy nipagawas sa mga pangalan.

Giangkon ni Conag nga nagduha-duha siya sa pagtuo sa mga miduol kaniya kay lagi aduna nay higayon nga sila giilad sa tawo nga mitahan apan diay namaligya gihapon og ginadiling drugas. DILT, (BANAT NEWS)