Daghang mga establisamento nga nakalapas sa EO gipasusi

CEBU, Philippines — Padayon nga gisusi ni Konsehal Dave Tumulak, Sinulog executive committee chairman ang mga establisamento nga giingong nakalapas sa Executive Order No. 44 ni Cebu City Mayor Tomas Osmeña atol sa nilabay’ng Sinulog grand parade.

Kahinumduman nga nagpagawas sa maong kamanduan si Osmeña nga nagdili sa pagpamaligya og ilimnong makahubog ug pagpahigayon og street parties ug ubang kalihukan sa rota sa Sinulog grand parade. Si Tumulak nagkanayon nga sa pagkakaron mga estorya pa lang ang iyang nadawat nga giingong adunay mga establisamento nga namaligya og ilimnong makahubog atol sa  nahisgutang kalihukan ug giingong adunay nagpahigayon og street parties bisan og gidili.

Matud ni Tumulak nga nagkinahanglan sila og konkretong ebidensiya sama sa hulagway o video ug nangayo na usab sila og tabang sa kapolisan aron pag-ila sa mga establisamento nga giingong nakahimo og kalapasan.

Gibutyag ni Tumulak nga nakadawat siya og ngalan sa mga establisamento pinaagi sa social media apan sa iyang pagsusi wala kini masulod sa 300-meter radius.

“So nanawagan pod ta sa public if ever duna sila’y mga picture or videos part sa violation sa liquor ban nga gipatuman, no street party niadtong Sinulog gi-welcome nato sila, ipadala lang nila sa atoang official website sa Cebu City Government”, awhag ni Tumulak. Ang city legal office mopadala og show cause order sa mga establisamento nga masutang nakahimo og kalapasan ug si Osmeña ang mopagawas og desisyon batok kanila. (BANAT NEWS)