Nagpakatap sa listahan sa patyunon gipangita

CEBU, Philippines — Subayon sa kapolisan ang mga  wa mailhing social media accounts nga nagpakatap og mga impormasyon kabahin sa mga “patyonon” nga mga opisyal sa San Fernando. Giawhag sab sa direktor sa Police Regional Office-7 nga si Chief Supt. Debold Sinas ang publiko nga tabangan sila pagtumbok niining maong mga netizens nga nagpasiugda niini.

“Yes and we will check it thru the IP address of the one who posted the fake news. We encourage those who have a copy of the fake news with IP address to submit it to police stations for examination and verification of our Anti-Cyber Crime Group,” ingon ni Sinas ngadto sa Banat News.

Niadtong Sabado, nakighinabi ngadto sa kadagkoan sa kapolisan ang mga opisyal sa barangay sa Lungsod sa San Fernando pinangulohan ni Kongresista Gerald Anthony ‘Samsam’ Gullas Jr. sa Unang Distrito. Na-alarma sila sa sunod-sunod nga patay sa ilang lungsod.  Samotan pa nga adunay mikatap sa social media nga daw gitagna na ang sunod nga mga patyonong opisyal. Naalarma usab ang mga opisyales sa giingong presensya sa mga bag-ong salta nga mga tao sa ilang lungsod sa wala pa nagsugod ang sunod-sunod nga patay sa San Fernando.

Nagsugod kining mga pagpatay niadtong Enero 10 dihang gipusil patay si San Fernando Municipal Councilor Reneboy Dacalos didto sa Barangay South Poblacion, sa maong lungsod.

Paglabay sa  unom ka adlaw gibanhigan patay sab kapitan sa barangay Magsico nga si Johnny Arriesgado didto gihapon sa South Poblacion.

Pag petsa 22, gibanhigan ang ilang mayor nga si Lakambini Reluya ug nakalas ang iyang bana nga si Ricardo Nonoy” Reluya Jr. ,presidente sa Association of Barangay Councils sa San Fernando.

Napatay sab sa maong pagpamanhig ang drayber sa mayora nga si Allan Bayot ug ang staff niini nga si Ricky Monterona.

Hangtud niining pagsuwat, wala gihapon masulbad sa kapolisan ang maong mga kaso. (BANAT NEWS)