Waste management, treatment facilities ipa-monitor

CEBU, Philippines – Si Department of Environment and Natural Resources-7 regional director Gilbert C. Gonzales mimando sa Environmental Management Bureau-7 alang sa pagpahigayon og istriktong inspection ug monitoring sa tanang waste management ug treatment facilities sa tanang resorts, malls ug hotels sa Central Visayas. Kini human nahimong isyu ang ilegal nga paglabay sa mga “untreated medical wastes” sa Mactan Channel.

“…we will begin by conducting a strict monitoring of waste management systems of large establishments in the region to make sure that major waste generators are handling their wastes responsibly,” matud pa ni Gonzales sa gipadala nga press statement

Si EMB-7 regional director William Cuñado sa iyang bahin mipasalig sa pag-atiman sa solid waste ug clean water concerns pinaagi sa pagpahamtang og silot niadtong dili motuman sa existing environmental laws, rules ug regulations.

Ang EMB magpadala og notices of violations ngadto sa mga establishments nga wala motuman sa mga kondisyon ubos sa Environmental Compliance Certificate ug sa temporaryong pagpahunong sa ilang operasyon.

“No wastewater shall be discharged to waterways without any proper treatment,” dugang pa ni Cuñado. (/DILT)(BANAT NEWS)

Dili transparent sa isyu sa basura

Decemay P. Padilla

CEBU, Philippines – Nagkanayon si Konsehal Joel Garganera nga ang kasamtangang administrasyon dili transparent sa garbage hauling scheme ilabi na ang kagamhanan sa siyudad diin karon nagplano nga mosulod og kontrata tali sa pribadong landfill aron makamenus sa gastuhan.

Si Garganera miingon nga sukad nga ang Inayawan landfill gipasirad-an, ang siyudad pinaagi sa direktiba sa mayor, mosulod og kontrata alang sa serbisyo sa mga provider diin migasto sila og minilyon.

Gikwestiyon ni Garganera kon ngano ang administrasyon wala maghuna-huna sa maong ideya sa sayo pa kay unta makadaginot ang siyudad og milyon alang sa garbage disposal.

“What was being practiced before was the most logical, the most practical and less cost… Nag-trial and error, why nag-ingon ana na? Because the Mayor is trying to be consistent that when you dump your garbage directly sa Consolacion, that’s illegal”, matud sa konsehal.

Si Mayor Tomas Osmeña dili gusto nga mohimo og transaksiyon sa private owned landfill sa Lungsod sa Consolacion tungod sa anomalosong kontrata sa miaging administrasyon.

Matud ni Garganera mihatag sila og ideya nga nagtugot sa North District barangays nga direktang molabay sa Consolacion aron mamenusan ang galastuhan, apan ang mayor giingong dili pabor niini.

Ang paglabay direkta sa dumping site, ang tipping fee anaa lang sa P700 matag tonelada sa basura.

Asoy niya nga subay sa plano sa executive department, makig-transaksiyon sila direkta sa private landfill paingon sa gihimong sanitary landfill project sa Brgy. Binaliw nga na-isyu kaniadto.

Niadtong Agosto 8, 2018 ang special use application alang sa Central Material Facility ug landfill sa Binaliw lakip sa approved resolutions atol sa kontrobersiyal nga sessions sa konseho sa siyudad. Sigon ni Garganera gikinahanglan gyud ang transparensiya sa public service aron malikayan ang mga isyu ug pagduda.

Ang mayor mitubag kang Garganera pinaagi sa pagbutyag nga ang pag-kontrata og landfill usa sa rekomendasyon sa consultant gikan sa Asian Development Bank (ADB).

“It’s subject to recommendation of the ADB consultants. Problem with Garganera is he thinks that we are like Team Suyop that gets into anomalous contracts”, pamahayag ni Osmeña.

Dugang sa mayor nga ang pag-transact og business sa private landfill ipaagi og public bidding o kaha Swiss challenge. (/DILT)(BANAT NEWS)