Drug overdose sa rave party gihimakak
CEBU, Philippines — Walay kakulian nga nabatyagan ang mga ahente sa Philippine Drug Enforcement Agency-7 atol sa usa ka concert nga gipahigayon sa Cebu Business Park niadtong Sabado sukwahi sa mikatap online nga giingong dunay na drug overdose atol sa maong event. Matud pa kini sa tigpamaba sa maong ahensya nga si Leia Albiar-Alcantara nga nakahinabi kagahapon.
Giingong pipila ka adlaw una pa ang maong event, lakip sila sa pagplano sa organizer nga mag-roving sa maong dapit uban sa ilang K9 Narcotic sniffing dogs diha sa Ayala Business Park.
Atol sa mismong event, wala silay na-detect nga kasikas sama sa nigawas nga report. Iyang giklaro nga dili tinuod nga “niresponde” sila kay daan na silang nagbantay didto.
Sukwahi kini sa mikatap sa social media kabahin sa 19 anyos nga babaye nga giingong namatay nunot sa giingong drug overdose atol sa maong party. Pangagpas niya nga kun tinuod nga nag take og drugs ang maong batan-on wala kini nahitabo sa mismong lokasyon.
“Naa sad mi mga covert nga mga agents pero wala man sila nakakita nga naay nag seizure or nag-collapse during sa event,” sigun ni Alcantara.
Samtang si Police Regional Office-7 Chief Supt. Debold Sinas sa iyang bahin miingon nga wala silay nadawat nga pormal nga report kabahin niini sanglit walay nagpa-blotter sa ilang mga buhatan ug puro ra tanan huhungihong ang ilang nadawat. (BANAT NEWS)
- Latest