1.5 milyon miuban sa foot procession

CEBU, Philippines —  Ang kapolisan miingon nga miabot sa 1.5 milyon ka mga deboto ang miuban sa foot procession basi sa ilang pagbanabana mga alas singko kagahapon sa hapon.

Si Police Senior Supt. Royina Garma, ang director sa Cebu City Police Office miingon nga malinawon ug hapsay nga napahigayon ang foot procession nga adunay gitas-on nga 5, 800 meters gikan sa Basilica Minore del Sto. Nino paingon Osmeña Blvd., M.J. Cuenco Ave., General Maxilom Ave., balik sa Osmeña Blvd. hangtud nga nahibalik ang mga imahe ni Señor Santo Niño, Birhen sa Guadalupe ug San Jose sa basilica.

Nagsugod ang prosesyon mga ala una sa hapon ug natapos mga alas 4:40.

Bugtong nasugatan nga problema sa kapolisan mao kadtong mga tawo nga buot mosuksok sa bagang duot sa mga deboto.

“Peaceful and orderly, meron lang area na maraming sumingit kaya medyo na disrupt ang aming movement sa security, but still manageable at this level,” asoy ni Garma.

Nasayran nga gi-divert ang mga deboto ug gipalayo gikan kanila ang mga karo sa mga imahe aron malikayan ang pagdumog niini.

Gibutyag ni Garma nga gipawong ang signal pagka alas tres hangtud alas nuybe kagahapon sa buntag alang sa fluvial procession, ug alas dose hangtud alas siete sa gabii alang sa foot procession.

Gipangandamn na sab nila ang bagang duot sa katawhan nga mosaksi sa mga kalihukan sa Sinulog Grand Parade karong adlawa diin mas daghang polis ug force multipliers ang ipakatap.

Si Palo, Leyte Archbishop John Du kinsa maoy nangulo sa pontifical mass human sa foot procession, malipayon kadaghang tawo nga miuban sa prosesyon kay bisan sa mga kalisod, kapait sa kinabuhi ug kalisdanan, wala gihapon sila mawagtangi sa paglaum ug nagpakita kini sa kahupayan sa ilang kaguol ug sa mga gibating kabug-at sa kinabuhi pinaagi sa presensiya ug sa ilang pagdebosyon sa Balaan nga Bata.

Awhag ni Du sa mga batan-on nga mahimong misyonero ug gamiton sa tarong ang ilang mga talento ug ipaambit kini ngadto sa ilang isig kabatan-on. - Mae Clydyl Avila ug Nichole Alexis A. Abas, USJR Intern, DILT, (BANATNEWS)