Mga Reluya nabalaka

CEBU, Philippines — Gibati og dakong kabalaka ang magtiayong Reluya nga pulos opisyal sa lungsod sa San Fernando nunot niining sunod-sunod nga kamatayon sa mga opisyal sa ilang dapit nga apil sa gilista sa ilang kaatbang sa politika nga patyon.

Si Kapitan Ricardo “Nonoy” Reluya, Association of Barangay Council (ABC) nibutyag nga ang mga pangalan nga gi-post sa social media sa ilang kaatbang gihinay-hinay naman og patay.

Matud pa ni Reluya nga apil siya ug ang iyang asawa nga mayor nga si Lakambini Neneth Reluya ang naa sa listahan.

Ang mga naapil sa listahan mao si konsehal Reneboy Dacalos ug laing konsehal ug ang pinakabag-o nga gipatay mao si Kapitan Johnny Arriesgado.

Asoy pa ni Reluya nga nakadungog siya sa giingong kalambigitan sa mga napatay nga opisyal sa ilegal nga drugas hinungdan nga gitutokan kini karon nga motibo.

Apan si Reluya nihangyo sa kapulisan nga unta ang anggulo sa politika dili nila isalikway. Gumikan sa iyang kabalaka modangop siya sa lokal nila nga kapulisan aron matagad ang gibuhat nga hulga sa ilang kaatbang.

Naglaraw sab sila nga mohimo og legal nga lakang kalabot sa pagpanghulga diha kanila. Gawas sa post nga hulga daghan nasab nga nadawat nga text message si Reluya gikan sa mga wala mailhing tawo maong magpatabang sila sa kapolisan sa probinsya. (/IBM)(BANATNEWS)