DSWD, Tourist police dangpan sa mga batang mawala

CEBU, Philippines – Lakip nga mobantay ang Department of Social Welfare and Development sa rehiyon (DSWD-7) sa mga kalihukan sa Fiesta Senior gikan sa foot procession, adlawng Sabado, Enero 19 ug sa Sinulog Grand Parade, Enero 20, adlawng Domingo. Ang focal officer sa disaster response and rehabilitation section sa maong buhatan nga si Sheba Dabon, mibutyag nga nakig-alayon na sila sa kagamhanan sa Dakbayan sa Sugbo ug sa kapolisan aron sa pagresponde kon adunay alarma nga motumaw.

Matud pa ni Dabon, ang ilang field office nga nahimutang sa Brgy. Carreta, ang himuong dangpanan sa mga bata nga mawala atol sa naasoy nga mga kalihukan karong Sabado ug Domingo.

Nunot niini, ilang giawhag ang mga ginikanan nga magbinantayon sa ilang mga anak ug kon mahimo butangan nila kini og identification card ug number aron kon mawala o mabiyaan sa grupo dali rang makontak ang mga tagtungod niini.

Si Cebu City Police Office director PSSupt. Royina Garma, miingon nga kadtong mga bata nga mabuwag sa ilang mga ginikanan, dalhon usab kini nila sa buhatan sa Tourist Police isip holding area.

Giawhag usab niya ang mga ginikanan nga kon mahimo dili nalang dalhon ang ilang mga anak dungan sa bul-og sa mga tawo ug dad-on gyud, butangan kini og ilhanan. (/DILT)(BANAT NEWS)