Patay sa san fernando konektado?

CEBU, Philippines – Gitan-aw karon sa giumol nga Special Investigation Task Group nga konektado kining tanang mga pagpatay sa mga elected officials sa Lungsod sa San Fernando.

Ang labing uwahing biktima mao si Magsico Barangay Captain Johhny Arriesgado nga gi-ambush niadtong Miyerkules sa gabii sa Barangay South Poblacion sa maong lungsod.

Samtang nakabsan gyud sa kinabuhi ang usa sa duha ka mga motorista nga nadumbolan sa sakyanan ni Arriesgado sa dihang nawagtangan na kini og kontrol sa manibela gumikan sa pagpaulan kaniya og mga bala sa mga mamumuno.

Ang usa sa nadumbolan nakabsan gyud sa kinabuhi nga giila nga si Agnes Alpetche Lauronal samtang nakagawas na sa tambalanan si Antonio Canoy. Usa ka SITG ang umolon aron pagtutok sa imbestigasyon sa kamatayon ni Arriesgado.

“Yes (we will form an SITG) because he is an elected official. It will be supervised by Senior Supt. Anghelito  Dumangeng and I will be the SITG commander,” butyag kini sa direktor sa Cebu Provincial Police Office nga si Senior Supt. Manuel Javier Abrugena.

Si Dumangeng maoy Deputy Regional Director for Operations sa Police Regional Office-7.

Nasayran nga sila sab ang nangulo sa SITG pag-imbestigar sa pagpusil patay kang San Fernando Municipal Councilor Reneboy Dacalos nga gipusil sud sa tindahan sa iyang bayaw sa miaging semana.

Si Abrugena misaad nga ilang siguradohon nga dili mabiyaan ang bisan usa sa maong mga kaso.

Si Police Chief Inspector Lymel Pasquin, hepe sa San Fernando Police station nagkanayon nga anggulo sa politika ug ilegal nga drugas ang usa sa ilang gitutokang anggulo. Ang biktima sama kang Dacalos gikatahong adunay koneksyon sa self- confessed drug lord nga si Franz Sabalones.

“(Mag) backtrack kung may nakaaway or nakaalitan siya before. We have information po na link siya ni Franz Sabalones pero titingnan po natin lahat ng anggulo,” sigun pa sa maong hepe atol sa press conference kagahapon.

Wala isalikway sa kapolisan nga posibleng konektado kining tanan tungod kay ang mga biktima pulos tanan mga tawo ni Sabalones.

Kahinumduman nga napatay si Tocillo Debalucos Ababon, niadtong Enero 9 karong tuiga dihang gibanhigan ang police car nga nagdala kaniya paingon sa korte sa Argao.

Pagkaugma niana, gipusil patay si San Fernando Municipal Councilor Reneboy Dacalos kinsa gipasanginlan sab nga adunay koneksyon ni Sabalones.

Base sa nakaylap nga mga impormasyon sa mga polis gikan sa mga nakasaksi sa krimen giingong sakay sa puti nga van ang gibana-banang upat ka mga mamumuno ang nagpusil kang Arriesgado nga parehas usab sa kang Dacalos.

Tulo niini giingong maoy namusil samtang ang usa maoy nagsilbing drayber sa maong puti nga van.

Pipila ka mga basiyo sa M16 Rifle ug kalibre .45 ang nakaplagan sa crime scene diin gipatay si Arriesgado.

Nagsubay si Arriesgado sa dalan paingon sa Dakbayan sa Sugbo sa dihang kalit kining gibanhigan.

Nawagtangan og kontrol sa manobila ang biktima ug naigo ang duha ka motorista nga silang Lauronal ug Canoy dayon nalahos kini sa taytayan sa maong dapit diin nabalitok iyang sakyanan.

Gidala pa sa Carcar District Hospital ang mga nangaangol apan kagahapon sa ala una sa kaadlawon nabugtoan na sa kinabuhi si Lauronal.

Sumala pa sa kapolisan, si Arriesgado nadakpan niadtong Hulyo 7, 2017 sa drug raid nga gihimo sa mga sakop sa Regional Intelligence Division diha sa panimalay niini pinasikad sa search warrant ug nakuhaan og pipila ka mga armas.

Lakip sa nadakpan sa maong raid ang mga konsehal nga silang Edwin Villaver ug si Alfonso Donaire. (/IBM)(BANAT NEWS)