Archbishop Palma nasubo sa pag-resign ni Java

CEBU, Philippines – Si Archbishop Jose Palma sa Archdiocese of Cebu, nasubo sa pagbasa sa resignation letter sa usa sa mga sakop sa Cebu Archdiocesan Commission on the Cultural Property of the Church Architect nga si Melva Rodriguez Java.

Ang Arsobispo miingon nga iya pa karon huna-hunaon kung iyaha bang dawaton ang resignation letter nga giduso ni Java ug malaumon siya nga masabtan kini sa architect.

Sumala pa ni Palma, iyahang nakita ang mga maanindot ug mabulokon nga kontribosyon ni Java sa daghan kaayo nga conservation nga gihimo sa mga lokal nga simbahan sama sa basilica, Argao, Carcar ug uban pa.

Dugang pa ni Palma nga gidebatehan nga Patria De Cebu dili maisip nga cultural heritage site kung dili usa lang ka building, ug kinahanglan na usab ang kabag-ohan tungod sa kasamtangan nga kahimtang niini nga dili na angay gamiton isip katulogan.

Giklaro ni Palma, walay bili ang iyang desisyon kung dili moagi sa admin board sa archdiocese nga gilangkuban sa advisory council matter on temporalities nga mga kaparian, ug layko.

Gitug-an sa Arsobispo, nga magpadayon ang construction sa bag-ong Patria de Cebu, human nadungog nila ang matag habig nga presentasyon nga gilangkoban sa mga eksperto ug dili lang iyang kaugalingon nga desisyon.

Ang pamahayag ni Palma, giluwatan human ni-resign si Archt. Java isip sakop sa CACCPC, tungod sa tinguha nga padayon nanalipod nga magpabilin ang Patria de cebu isip adunay dakong History sa Sugbo. - /LPM (BANAT NEWS)