Kapitan sa Barangay Magsico, San Fernando gipusil patay
CEBU, Philippines – Patay ang kapitan sa Barangay Magsico, Lungsod sa San Fernando human kini pusila sa wala mailhing kriminal kagahapon sa gabii diha sa Barangay South Poblacion sa nahisgutang lungsod
Ang biktima mao si Johnny Arriesgado, 56-anyos kinsa giingong nadakpan kaniadto sa kapolisan tungod sa paghupot niini og armas nga walay lisensiya.
Si Chief Inspector Lymel Pasquin, hepe sa San Fernando Police Station nagkanayon nga sa wala pa mahitabo ang insidente ang biktima nagmaneho kini sa iyang multicab diha sa highway sa nahisgutang barangay dihang kalit lang kining gipusil.
Ang mga nakasaksi sa hitabo nitug-an sa kapolisan nga nakita nila ang sakyanan ni Arriesgado nga nisaliring ug natuwad kini diha sa tulay duol sa lugar diin sila nakadungog og buto sa armas.
Sa oras sa pagsuwat niining balita ang mga imbestigador padayon pa nga nagkuha og mga ebidensiya diha sa crime scene.
Niadtong Hulyo 7, 2017 si Arriesgado lakip sa tulo ka opisyal sa lungsod sa San Fernando nga nasikop sa managlahing pagpangronda ssa Regional Intelligence Division (RID) sa Police Regional Office (PRO)-7. Uban nga nasikop sila si Konsehal Edwin Villaver, Alfonso Donaire, IV ug Arriesgado kinsa presidente sa Association of Barangay Council ug ex-officio member sa konseho sa lungsod.
Ang maong pagpangronda pinasikad sa search warrant nga giluwatan ni Regional Trial Court (RTC) Judge Jerry Didican.
Sa nilabay’ng semana ang konsehal sa lungsod nga si Reneboy Dacalos, 51-anyos ang gipusil patay usab sa wala mailhing kriminal diha sulod sa tindahan sa iyang bayaw sa Barangay South Poblacion. (/BDB)(BANAT NEWS)
- Latest