4 ka babayeng hepe gibutang sa component cities

CEBU, Philippines — Upat ka component cities sa Lalawigan sa Sugbo ang gipamutangan og babaye nga mga hepe. Gihatagan og kahigayonan sa kadagkuan sa kapolisan sa rehiyon siete ang mga babayeng polis nga maoy mangulo og police station aron ipakita nga walay diskriminasyon.

Ang direktor sa Cebu Provincial Police Office (CPPO) nga si Police Senior Supt. Manuel Javier Abrugena nagkanayon nga masaligon siya nga maayong modala og estasyonan ang mga babayeng opisyal.

"Lagi na lang bang mga lalaki maging chief of police sa mga known big cities? It's about time na mabigyan ng equal opportunity ang ating mga lady police officers," matud ni Abrugena.

Ang tigpamaba sa CPPO nga si Police Superintendent Janette Rafter mao nay gitahasang maghepe sa Dakbayan sa Toledo. Si Police Supt. Emelie Santos kinsa deputy city director for operation sa Cebu City Police Office gidestino isip hepe sa Dakbayan sa Bogo.

Sa Dakbayan sa Carcar gibutang si Police Supt. Clarise Gabutan samtang si Police Supt. Maribel Getigan maoy hepe sa Dakbayan sa Danao.

Giangkon sa mga babayeng hepe nga dakung hagit kanila ang paghupot sa maong katungdanan sanglit gawas nga mga dagkung siyudad ang ilang dalhon, adunay say mga maayong accomplishment records ang maong mga estasyonan.

Sa datos sa CPPO, nag-una ang Toledo City Police nga adunay labing daghang accomplishment sa loose firearms ug top five sab sila sa accomplishment sa pakigbatok sa ilegal nga druogas.

Ang Danao City Police sab anaa sa top three sa daghang accomplishment sa loose firearms ug top two sa anti-illegal drugs operation. Top five sa loose firearms ang Carcar City Police ug top five sa labing daghang kalampusan sa operasyon kontra drugas. Samtang and Dakbayan sa Bogo una nang gideklarar sa lokal nga kagamhanan nga drug free na.

"We will just do our best… If men can do, women also can do it," sigon ni Getigan kinsa midugang nga aduna siyay kasinatian sa police station apan unang higayon kini niyang mahimong hepe.

Samtang si Rafter nagkanayon nga bisan pa man og aduna siyay kasinatian pagkahepe kaniadto, grabe gihapon ang pressure sa iyang bahin kay daku nga dakbayan ang iyang huptan. Matud pa nga hagit sab alang kanila ang pagbalanse sa ilang trabaho ug sa ilang papel isip inahan sa ilang mga anak ug asawa sa ilang mga bana.

"As a public servant we always have a call of duty away from our family it's part of the service. It's part of what we chose. We can make an adjustment for it," sigon pa ni Rafter.

Pormal na nga molingkod ang upat sa ilang pwesto karong adlawa. Ang mga gipulihan nila nga mga hepe, gidestino na gawas sa CPPO.  DILT, (BANAT NEWS)