Inmates sa CPDRC moapil sa Sinulog; mga lungsod nagpatabang sa Kapitolyo

CEBU, Philippines — Moapil sa selebrasyon sa Sinulog karong tuiga ang mga priso diha sa Cebu Provincial Detention and Rehabilitation Center (CPDRC).

Matud ni Reynaldo Valmoria, warden sa CPDRC nga niumol og upat ka grupo ang mga inmate diin matag grupo mosayaw sa Sinulog  dance.

Nagpadayon sa ilang praktis ang mga inmate alang sa ilang presentasyon karong Dominggo, Enero 20 diin ang maong kalihukan gipasiugdahan sa mga bosyo sa maogn pasilidad.

Matud ni Valmoria nga anha lang mosayaw sa quadrangle ang mga priso ug dili moapil sa grand parade ug walay mga bisita o pamilya sa mga piniriso nga makasaksi sa ilang pasundayag.

Gipasabot ni Valmoria nga naandan ug tradition na kini sa mga priso diha sa CPDRC ang magpahigayon og Sinulog isip halad nila kang Senior Santo Niño atol sa kapistahan niini.

Sa laing bahin, gibutyag ni Gobernador Hilario Davide,III nga pipila sa mga contingent sa  mga lungsod sa probinsiya nga niapil sa Sinulog sa Lalawigan ang nagpatabang sa Kapitolyo alang sa ilang pag-apil.

Lakip niini ang Lungsod sa Daanbantayan nga nihangyo og sakyanan paghakot sa ilang mga dancer.

Ang maong lungsod wala niapil sa Sinulog sa Lalawigan deretso na kining niapil sa Grand parade karong Enero 20.

Dugang ni Davide nga ang Dakbayan sa Bogo nangayo usab kini og assistance sa Kapitolyo alang sa ilang pag-apil sa Sinulog karong tuiga. BDB, (BANAT NEWS)