SIMEX gipahigayon alang sa seguridad sa Sinulog

CEBU, Philippines — Ang direktor sa Cebu City Police Office (CCPO) Superintendent Royina Garma nipadayag nga adunay nakitang lapso sa gipahigayong SIMEX o bomb explosion simulation kagahapon sa hapon diha sa Bank of Commerce nga nahimutang sa kilid sa Cebu City Hall.

Gibutyag ni Garma nga ang maong mga lapso mao nga ang ilang “call signs” dili sila familiarize, ang koordinasyon sa maong lugar ug ang gamay nga kalibog sa mga lugar nga butangan sa mga kunohay naangol nga mga civilian.

Ang SIMEX usa kini ka preparasyon alang sa seguridad sa Sinulog grand parade.

Lakip sa maong simulation ang kapolisan, Armed Forces of the Philippines, Cebu City Quick Response Team, Police SOCO Team ug K9-units ug handler niini.

Sa laing bahin, adunay 16 ka K9 bomb sniffing dogs gikan sa mga law enforcement unit lakip na ang upat ka Army K9 gikan sa national headquarters sa Philippine Army ipakatap alang sa Sinulog.

Lakip niini ang K9 units sa Police Regiona Office-7 Explosive Ordnance Division (EOD) ug sa Philippine Coast Guard.

Si AFP- Task Force Cebu Commander Noel Baluyan nagkanayon nga gawas sa upat ka K9 units nga gipadala sa ilang national headquarters adunay upat ka K9 units sa AFP- Central Command nga nakareserba kon manginahanglan ang kapolisan.

Sa laing bahin usab, ang kapolisan sa Dakbayan sa Sugbo niawhag sa mga ginikan nga i-monitor ang kalikuhan sa ilang mga kabataan niining panahon sa Sinulog ilabi na dili sayon ang pag-monitor sa mga party drugs.

Matud ni Garma nga aduna sila’y nadawat nga impormasyon kalabutan sa party drugs.

Giingong ang lahi na ang klase sa mga party drugs karon tungod kay susama nalang kini og papel hinungdan nga dili nila maderetso og search.

Ang mga gininakan kinahanglan nga mopahimangno sa ilang mga anak nga dili mogamit og party drugs ug susihon kanunay ang mga kalihukan niini ilabi na nga daghang rason nga mogamit ang kabataan sa party drugs. Nichole Alexis A. Abas, USJR Intern, BDB, (BANAT NEWS)