Gidaghanon sa photographer nga moapil sa Sinulog gipaubsan
CEBU, Philippines — Gihulagway ni Sinulog executive committee chairman Konsehal Dave Tumulak nga hapsay ug nahuman sa tukmang oras ang gipahigayong Sinulog sa Lalawigan ug Sinulog sa Barangay sa dakbayan niadtong Sabado ug Domingo.
Nagpasalamat si Tumulak sa tanang nisalmot sa kalihukan tungod kay nituman kini sa tanang kondisyon nga gihatag ngadto kanila hinungdan nga nahuman ang kalihukan alas 5:00 sa hapon nga maoy tukmang oras.
Giangkon ni Tumulak nga sa Sinulog grand parade nakabaton sila og kalibog tungod sa kadaghan sa mga niapil.
Hinuon aduna sila’y gihimong plano, usa niini mao ang pagmenos sa gidaghanon sa mga photographer nga nisalmot sa photo contest diin kaniadto niabot og dul-an sa 1,000 apan karon naa nalang sa 200.
Si Tumulak niawhag sa mga photographer nga samtang aduna pa sila’y oras mangita na sila og lugar diin pwede silang mopwesto nga dili makababag sa mga dancer aron matuman ang gitinguha nga oras nga mahuman ang kalihukan.
Si Tumulak nihangyo usab sa mga contingent ingon man sa mga spectators nga maghimo daan og contingency plan sanglit dunay nagdanga-danga nga low pressure area ug giingong 40 porsyento nga mahimo kining tropical depression.
Dugang niini, ang presyo sa ticket sa Sinulog grand parade magdepende sa color sa grand stand, ang pink P1,000; blue P2,500; yellow P1,500 ug ang green P1,000. (BANAT NEWS)
- Latest
