ATM cards sa kapolisan tua sa tigpatanto

CEBU, Philippines — Paimbestigahan ug pasakaan og kaso sa kadagkuan sa Police Regional Office-7 ang nagpaluyo sa mga ATM (automated teller machine) card loan shark nga maoy nakapalubong sa mga polis sa utang ug maoy hinungdan nga mangutong na hinuon.

Nasuta ni PRO-7 director PCSupt. Debold Sinas nga adunay mga polis nga wala na nila ang ilang mga ATM cards ug atua na sa mga tigpatanto.

Niadtong Sabado, dihang girelibohan ang tanang polis sa Lungsod sa Daanbantayan ug San Fernando, adunay tulo ka mga polis nga wala nay ATM card kay giprenda na sa tigpa-utang.

Si Sinas nagkanayon nga ila kining tabangan pinansyal aron mahaw-as sa utang.

Plano sab karon sa direktor nga magpatabang sa Kampo Crame aron maimbestigahan ug pormal nga mapasakaan og kaso ang mga loan shark.

“We are finding support sa Camp Crame na ibuy-out na or file-lan namo og kaso nganong tua sa ilaha ang ATM,” matud ni Sinas.

Ang mga loan shark mao kanang magpautang nga adunay daku kaayo nga interest rate.

Kahinumduman nga dihang milingkod si Presidente Rodrigo Duterte, iyang gimanduan ang Securities and Exchange Commission (SEC) nga gukoron ang mga loan shark sa Pilipinas nga maoy nakapasamot sa kapobre sa mga Pilipino nunot sa kadaku sa ilang interest rate.

Kasagarang mga loan shark walay mga Certificate of Authority to operate as a lending company ug misumiter og mga peke nga mga bank certificate.

Matud ni Sinas nga gikinahanglang dili buwagon sa polis ang iyang ATM aron mamonitor ang pagsaka sa ilang sweldo ingon man sa ilang mga allowance.

“Naay increase sa sweldo karon, kinahanglan ma-appreciate sa atong mga polis. Kung ang ilang sweldo tua didto sa loan shark tapos nag-agad na lang sila kung unsay ihatag, di sila kabalo (nga naay increase),” sigon sa heneral.

Dugang niini nga sugod karong tuiga, kada semana na check-up-pon kon anaa pa ba sa kamot sa polis ang ilang mga ATM cards.

“This is one way na ma-assure mi nga maayo sad mag-manage ang atong tao sa kwarta kay it’s been proven na pag ang atong polis daghay utang, di na man kaayo na motrabaho, mao na nay magmalatuba (manugal), mangutong, gusto magpa-assign sa DEU (Drug Enforcement Unit) to raise funds,” nagkanayon si Sinas. (BANAT NEWS)