Datu nga kandidato pabor sa piniliay
CEBU, Philippines — Giangkon sa election officer sa Siyudad sa Talisay nga ang balaud sa pagkandidato sa piniliay patas alang sa tanan.
Apan sama sa uban, naobserbahan sab ni Atty. Gallardo Escobar nga maglisud gyud ang mga kandidato nga walay igong salapi sa paglahutay sa kampanya.
Sama nalang sa nakita sa palibot nga daghan na nga mga tarpaulin ang gipangmontar nga adunay dagway sa mga politiko nga mitimbaya sa Pasko, New Year ug Sinulog. Ang pagpagama sa tarpaulin gigahinan na kini og salapi.
Bisan og wala pay kampanya, walay nakita sa balaud nga nakalapas ang maong mga politiko nga nagtaud na sa ilang dagway sa bisan asang lugar aron sila mailhan.
“As much as possible fair gyud ta equal opportunity for all pero usahay life is unfair pero sa balaud fair ta,” nagkanayon si Escobar.
Gilauman nga mas modaghan pa unya nga mga tarpaulin ang magbandilyo sa dagway ug mga pangalan sa mga politiko sa umaabot nga mga adlaw.
Si Escobar miingon nga andam na ang ilang buhatan sa umaabot nga piniliay.
Gani sa pagkakaron nagsugod na ang election period diin adunay pagpahigayon og checkpoint ang kapolisan. (BANAT NEWS)
- Latest
