Cebu City gipabalibaran sa NFA
CEBU, Philippines — Ang National Food Authority wala motugot sa Cebu City government nga mopalit og 10,000 ka sakong bugas alang sa mga apektadong drayber sa Angkas ug habal-habal.
Si Ma. Belen Barbanida, NFA provincial manager sa iyang gipadala nga suwat kang Mayor Tomas Osmeña niadtong Disyembre 20, 2018 nagkanayon kini nga mo-accommodate lang sila og rice purchases panahon sa kalamidad.
Niadtong buwan sa Disyembre sa niaging tuig si Osmeña nihangyo sa NFA nga tugotan ang siyudad nga makapalit og mga bugas isip hinabang sa mga apektadong drayber.
Nunot niini, si executive assistant to the mayor Francisco Fernandez nagkanayon nga mopahigayon sila og bidding process sa pagpalit og mga bugas.
Gibutyag ni Fernandez nga ang P15 milyones nga budget nga gamiton sa siyudad ang gikan sa pundo sa Philippine Amusement and Gaming Corporation (PAGCOR).
Ang Dakbayan sa Sugbo aduna kini 4,000 ka Angkas driver ug 2,500 ka habal-habal driver.
Sa iyang bahin, ang pangulo sa Bids and Awards Committee Ronaldo Malacora nibutyag nga karong Enero 29 ang schedule sa pagbukas sa public bidding. (/BDB)(BANATNEWS)
- Latest
