DILG mitingog sa suspension

CEBU, Philippines —  Ang Secretariat sa Sangguniang Panlungsod dunay katungod sa pag-implimentar sa suspension order batok ni Mambaling Barangay Captain Gines Abellana.

Si Department of Interior and Local Government (DILG) Cebu City Officer-in-charge Emma Joyevelyn Calvo miingon ubos sa Republic Act 7160 kun Local Government Code, ang sekretarya sa Konseho sa siyudad dunay gahom sa pag-implementar sa order nga gi-isyu sa legislative body.

 “If ang council nagpa-suspend, ang secretariat ang mo-implement. Tagaan nalang mi og copy diri,” matud ni Calvo.

Nitumaw ang maong isyu human si Abellana gisuspenso sa katungdanan tungod sa reklamong abuse of authority nga gisang-at batok niya sa upat ka mga konsehal niini nga kaalyado sa Bando Osmeña Pundok Kauswagan (BOPK).

Ang upat ka mga Konsehal mao sila si Anne Marie Vestil Palomo nga maoy acting Barangay Captain, Edwil Managbanag, Neonita Cuestas ug Victoriano Laborte nga mipasaka og administrative complaint batok ni Abellana kay wala gi-release ang ilang monthly honoraria gikan sa Hulyo hangtud sa Disyembre 2018.

Si Abellana nagdumili sa pagkanaog sa katungdanan hangtud nga wala’y opinyon gikan sa DILG labot sa iyahang inquiry sa legalidad sa pag-asumir ni Palomo.

Niadtong Huwebes, ang suspended Barangay Captain mipadala og inquiry letter sa DILG kun balido ba o dili ang pag-asumir ni Palomo.

"I am therefore asking your legal opinion as to the validity of the taking over of the barangay hall of Barangay Mambaling, Cebu City by her and her cohorts," tipik sa suwat ni Abellana. Kagahapon sa buntag dunay nahitabong komosyon sa Barangay Hall human si Palomo ug Abellana nag-abot.

Si Palomo sa iyang bahin miingon nga mohimo siya sa iyang trabaho isip Kapitan sa Barangay tungod kay kun dili siya motrabaho makasuhan siya og dereliction of duty. “I already assumed since yesterday when I took oath, I have to otherwise mag dereliction of duty and function ko,” matud ni Palomo.

Gani nagplano siya nga mohimog legal action batok ni Abellana tungod sa usurpation of authority.

Kagahapon sab, ang mga empleyado sa barangay uban sa representante sa DILG miabli sa buhatan sa barangay treasurer aron pagsusi sa mga importanteng dokumento.

Niadtong Enero 3, gisirad-an ni Abellana ang buhatan ni Ivy Gabiana ang barangay treasurer aron dili na kini maka-transact human gi-terminate sa trabaho.

Si Abellana mi-isyu og notisya sa non-extension sa serbisyo ni Gabiana nga dunay petsa December 31, 2018.

Giangkon ni Abellana sa iyang pag-asumir sa katungdanan niadtong July 2018 nagplano kini nga tangtangon si Gabiana tungod sa matud pa mga anomaliya nga gihimo niini.  IBM (BANATNEWS)