Election officer sa Talisay andam na sa lahugay
CEBU, Philippines — Andam na ang election officer sa Siyudad sa Talisay nga mobalhin ngadto sa laing lugar samtang nagkaduol ang piniliay.
Si Atty. Gallardo Escobar nibutyag nga nag-una sa pagbalhin ang mga election officer sa city ug provincial level ug sila na usab unya ang mosunod.
Matud ni Escobar nga mao kini ang naandan nga samtang nagkaduol ang piniliay adunay mahitabong lahugay sa mga election officer aron malikay sila sa isyu.
Si Escobar nagtuo nga adto siya ibalhin sa Dakbayan sa Toledo ug ang temporaryong mopuli kaniya si Atty. Charise Faith Sojor nga gikan sa Siyudad sa Naga.
Ug mahitabo kini karon pang buwan sa Marso tungod kay paaboton pa nila ang kamanduan gikan sa labaw nila nga buhatan.
“Mao man gyud ni ang naandan. Anyway, trabaho raman pud ni ang amo. Walay problema”, matud ni Escobar.
Hinuon inig human sa piniliay ug malibkas na usab ang ban mabalik usab siya sa Siyudad sa Talisay nga maoy iyang item lakip na ang ubang election officer mabalik usab sa ilang pwesto. BDB (BANATNEWS)
- Latest
