Nanghulgang mamusil sa silingan sikop

CEBU, Philippines —  Nagtingkagol sa detention cell sa San Nicolas Police Station ang usa ka lalaki kinsa gipasanginlang nanghulga nga mamusil niadtong Huwebes sa hapon diha sa Barangay Suba, Dakbayan sa Sugbo.

Ang suspetsado mao si Marlito “Totoy” Ompad Sablas, 42-anyos, residente sa A. Borres Street sa nahisgutang barangay.

Si Sablas nasikop sa kapolisan human kini giingong nihulga nga mamusil sa iyang silingan nga si Serafin Arivado, 67-anyos.

Si Chief Inspector Henrix Bancoleta, hepe sa San Nicolas Police Station nagkanayon nga atol sa hitabo ang anak ni Arivado ang nidagan paingon diha sa police station ug nangayo kini kanila og panabang.

Base sa imbestigasyon sa kapolisan nga si Sablas kinsa giingong adunay dalang armas nianha sa balay ni Arivado ug giingong nisulti kini ngadto sa biktima nga “patyon tika!”.

Apan si Sablas nihimakak sa pasangil batok kaniya ug giingong nangangkon nga gidala niya ang iyang armas aron ipaayo  tungod kay gubaon kini ug gani walay sulod nga bala.

Laing pangangkon ni Sablas nga wala siya nisulod sa balay ni Arivado apan nagtuo kini nga maoy iyang tuyo.

Nasakmit sa mga polis gikan kang Sablas ang kalibre .22 nga revolver nga adunay upat ka bala.

Si Sablas ang mag-atubang og kasong illegal possession of firearm ug attempted homicide. - Nichole Alexis A. Abas, USJ-R Intern, BDB (BANATNEWS)