Ayaw pagdala og gidili
CEBU, Philippines — Mga debotos sa Balaang Bata nga moapil sa fluvial procession, gipahimangnuan nga dili magdala og mga gidili atol sa kalihukan sa kadagatan.
Ang Coast Guard Cebu subling mipahimangno nga gidili ang ilimnon nga makahubog, pabuto, gidili nga drugas, armas, bisan unsa nga mahait nga hinagiban ug mga balloons.
Mipahimangno usab sila nga dili paapilon ang mga bata nga 12-anyos paubos sa fluvial procession, lakip na usab ang overloading ug overcrowded nga mga sakayang pandagat.
Ang mga moapil nga motorbanca o barko kinahanglan anaa sa gisabutan nga tapukanan sa dili pa molapas ang alas kwatro sa kadlawon karong Enero 19. Ang pakyas sa pagsunod sa maong gabayan, moresulta sa pagluwat og inspection o apprehension reports.
Matud ni LCDR Alvin Dagalea, PCG Commander, ang M/V Super Joy nga mag-atang sa Muelle Osmeña Wharf maoy gidesignar nga galleon nga maoy luwanan sa imahe ni Sr. Santo Nino. Gipahibawo ni Dagalea nga moagi usab ang maong barko og safety inspections sa MARINA.
Samtang ang tanang sakayang pandagat kinahanglan momentenar og deretso nga dagan sa Mactan Channel sa gikusgon nga 5 knots ug dili mahimong mo-overtake sa galleon. Kinahanglan nga 50 metros ang ilang gilay-on sa galleon aron sa paglikay sa disgrasya. Ang pakyas sa pagsunod niini, ma-isyuhan sab og inspection/apprehension reports o detention. DILT (BANATNEWS)
- Latest