Konsehal gipatay
CEBU, Philippines — Ikapitong konsehal sa lungsod sa San Fernando patay human kini gipusil sa wala mailhing mamumuno sa sulod sa tindahan sa iyang paryente sa Barangay Poblacion sa maong lungsod kagahapon. Siya na ang ikaunom nga konsehal sa lungsod nga gipatay sukad niadtong 2016 dinhi sa Sugbu.
Ang biktima naila nga si Konsehal Reneboy Dacalos, 51, kanhi kapitan sa Barangay South Poblacion ug konsehal na karon sa maong lungsod ug giingong konektado sa self-confessed druglord nga si Franz Sabalones.
Si Senior Inspector Arvi Arbuis, hepe sa San Fernando Police Station nitug-an sa Banat News nga bag-ohay pang nikanaog sa iyang Isuzu D-Max ang biktima ug midiretso og sud sa tindahan sa iyang bayaw ug nilingkod sa monobloc chair.
Dihadiha, upat ka wala mailhing lalaki ang nisulod ug gipaulanan siya og bala. Matud pa nga duha ka motorsiklo ang gisakyan sa mga mamumuno.
Walo ka basiyo sa bala sa kalibre 45 ug tulo ka slugs ang nakuha sa crime scene.
Matud ni Arbuis si Dacalos naapil sa matrix ni Franz Sabalones nga na-validate gikan sa regional headquarters. Matud niya sukad nga siya nilingkod katulo niya giduaw si Dacalos aron ipa-clear iyang pangalan, apan igo ra siyang gitubag nga mangonsulta kini og abogado.
Wala gyud hinuon masayod si Arbuis kun unsay papel ni Dacalos kang Sabalones kinsa taga San Fernando sab. Pagkakaron, panagribal sa negosyo sa kan-anan ug tindahan diha sa merkado, politika ug ang koneksyon kang Sabalones ang ilang gitan-aw nga motibo.
Gidala pa unta kini sa pribado nga tambalanan sa Dakbayan sa Naga apan gideklarar kini nga patay na. Ang asawa niini mihimakak sa mga alegasyon batok sa iyang bana bahin sa ilegal nga drugas.
"Pobre ra intawon mi, mosugot ra man gani mi kaon og ginamos, wala gyud na siya muduwa anang illegal nga drugas, masuko man gani na siya nga iyang mga taw, mogamit," matud ni Nora, asawa sa biktima.
"Hustisya among pangitaon, kay dili makatarunganon nga patyon ra ka kay abi nasuod mi niya (Franz Sabalones),"dugang pa niini. IBM (BANAT NEWS)
- Latest
