Ulanon ang weekend; Kapitolyo nangandam sa huwaw

CEBU, Philippines — Gilauman nga makabaton og ulanon nga weekend kini base sa forecast sa Philippine Atmospheric Geophysical and Astronomical Services Administration (PAGASA).

Si Engineer Al Quiblat sa PAGASA Mactan-Cebu nagkanayon nga sa Sabado ug Domingo makabaton og mapanganurong kalangitan ug katag nga pat-ak-pat-ak sa uwan gikan sa hinay ngadto sa kasarangan.

Awhag ni Quiblat ngadto sa mga deboto ni Santo Niño ug sa mga adunay kalihukan sa adlaw nga Sabado nga kinahanglang magdala ug mga payong o mga cover sa ulan. Si Quiblat niawhag  sa katawhan sa kanunay nga pagpaminaw sa radyo aron sila ma-update sa lakat sa panahon ug pwede usab nga mobisita sa ilang website alang sa  mga kalambuan sa lakat sa panahon.

Sa laing bahin, nagsugod na og pangandam ang Probinsiya sa Sugbo sa posibleng pag-igo sa El Niño  sa lalawigan karong tuiga.

Matud ni Baltazar Tribunalo, Jr., pangulo sa Provincial Disaster Risk Reduction and Management Office (PDRRMO) nga base sa advisory sa PAGASA adunay potential nga huwaw ang moigso karong tuiga.

Ug tungod niini giandam sa PDRMMO ang pundo nila nga P3 milyones ngadto sa P5 milyones gikan sa disaster preparedness fund sa buhatan.

Gawas niini, adunay P50 milyones nga pundo sa quick respond fund nga magamit sa Kapitolyo kong ugaling madeklara ang state of calamity tungod sa huwaw.

Nakig-alayon usab karon ang PDRRMO ngadto sa Provincial Veterinary ug Provincial Agriculture’s Office alang sa mga pamaagi nga andamon hilabina nga ang mga hayopan ug mga pananom ang labing maapektohan kon adunay huwaw. Ang PDRRMO nakig-alayon usab karon sa National Irrigation Authority aron nga mapahimuslan ang mga programa sa patubig sa maong ahensiya.  BDB (BANAT NEWS)