Mga priso sa TCJ gibansay alang sa emer-hensiya
CEBU, Philippines — Gibansay sa kabomberohan ug sa mga sakop sa Talisay City Disaster Risk Reduction and Management Office (CDRRMO) ang mga piniriso sa Talisay City Jail sulod sa pipila ka adlaw.
Si SFO2 Guillermo Pegarido nibutyag nga gitudloan nila ang mga piniriso sa ilang angayang buhaton kon adunay sunog nga mahitabo sa ilang pasilidad.
Lakip usab sa ilang gibansay ang mga sakop sa Bureau of Jail Management and Penology (BJMP) aron makahibawo usab sila sa ilang mga buhaton sa pagluwas sa mga binilanggo nga dili usab makahigayon og ikyas panahon kong adunay katalagman nga mahitabo.
Matud pa ni Inspector Christian Noel Obispo, assistant warden sa TCJ nga dakong tabang kanila ug sa mga tawo nga naa sa ilang pasilidad ang ilang mga nakat-onan.
Samtang si Alvin Santillana, pangulo sa CDRRMO nagkanayon nga ilang gilibot ang tanang ahensiya sa gobiyerno aron ipaambit ang ilang nahibaw-an sa pagtubag kun adunay mahitabo nga katalagman.
Dugang ni Santillana nga labing maayo kong adunay mahibaw-an sa angayang buhaton kong adunay emerhensiya nga mahitabo. BDB (BANAT NEWS)
- Latest