Signal shutdown alang sa seguridad

CEBU, Philippines — Aron masiguro gyud nga luwas, hapsay ug malinawon ang Sinulog 2019 si Cebu City Mayor Tomas Osmeña pabor sa pagpatuman sa signal shut  down atol sa foot procession ug Sinulog Grand Parade karong umaabot Enero 19 ug 20.

Nanghinaut ang mayor nga ang mga kalihukan subay sa kapistahan sa Santo Nino, walay mahitabong problema ug miasoy kini nga ang tanan nakaalerto.

Gihulagway ni Osmeña importante gyud nga dili ikompromiso ang kaluwasan sa katawhan mao nga angay nga mosunod sa unsay gidili aron malikayan ang kasamok.

Midugang kini nga bisan og mamenusan ang mga kalingawan, wala siyay problema niini sanglit ang kapistahan alang sa mga bata ug dili sa mga palahubog ug adis-adis.

“The fiesta is for the children, so atong i-create ang environment nga mogawas gyud ang atong mga bata, that’s the thrust so that when they grow up they will have a good memories of the Sinulog”, ni Osmeña pa.

Gipasabot sab niini nga ang rason nganong suportado niya ang pagpatuman sa signal shutdown mao ang seguridad sa tanang katawhan nga mosalmot unya sa mga naasoy nga kalihukan.

Iyang giawhag ang katawhan nga mangandam og mag-adjust kay mabuhi ra ang tawo bisan og walay signal. “I grew up without signal na so don’t say we cannot live without it. Even if there is a one percent chance that something bad will happen that’s very high we cannot take any chance at all because remember Sinulog is a situation where if something happens we cannot react. Just too many people.” matud sa mayor.  DILT (BANAT NEWS)