24 ka contingents, PNP gihatagan og P400 thousand
CEBU, Philippines — Gihatag kagahapon sa kagamhanan sa Siyudad sa Sugbo ang tag P400 mil nga subsidy ngadto sa 24 ka mga contingents nga mosalmot sa Sinulog Grand Parade ug laing P400 mil ngadto sa kapolisan aron makapalit og ibayad sa ilang mga panginahanglanon. Gilangkuban kini sa mga moapil sa Sinulog sa Kabataaan sa Barangay nga adunay katorse ka contingents, sa lalawigan nga unom ka contingents ug ang out-of-town contingents nga upat ka buok. “…gitingob nalang gyud ang P400 thousand so that para maka-full sa ilang mga palitunon ang atoang mga contingents para sad ma-preparar nila.”, asoy ni Konsehal Dave Tumulak ang executive chairman sa Sinulog 2019.
Gihatag sab kagahapon ang P400 mil nga financial assistance sa kagamhanan sa siyudad ngadto sa kapolisan. Si Tumulak miasoy nga kon makuwangan ang kapolisan mahimo silang mo-request sa Sinulog Foundation Incorporated alang sa dugang pundo.
Una nang namahayag si Cebu City Police Office director PSSupt. Royina Garma nga wala silay nadawat nga hinabang pinansiyal gikan sa kagamhanan sa siyudad. Kay nalangay og hatag ngadto sa CCPO ang kwarta, ang Police Regional Office-7 miabuno una. Nakadawat sab sila og P70 mil gikan sa ilang advisory council. Giabagan usab sila sa Simbahang Katoliko alang sa pagpakaon sa mga polis nga nagbantay sa Basilica Minore del Sto. Niño. Matud pa sa usa ka masaligang tinubdan, giutang sa CCPO ang suplay nilang ilimnong tubig alang sa mga polis nga nagbantay sa seguridad.
Laing gibutyag ni Garma nga bisan ang mga tent ug pagbutang og mga railings, sila ra ang milihok.
Giingong ang mga station commander ang nanghuwam gikan sa mga barangay kapitan og mga tent ingon man mga railings nga gamiton sa seguridad. Gipadayag usab ni Garma ang iyang pasalamat sa gihatag nga kapin 200 ka radyo gikan kang Presidential Assistant for the Visayas Michael Dino.
Nunot niini aduna nay mga base radio ang tanang estasyonan sa polis lakip na ang kampo sa City Mobile Force Company. Niadtong Lunes, gihatagan sila og dugang radyo nga adunay Global Positioning System nga maka-detect kun kinsa kadtong mogawas na sa designated area nga bantayan.
Nasayran nga daku og tabang ang mga radyo alang sa komunikasyon sa kapolisan ilabi na nga pagngon ang signal atol sa pista. DILT (BANAT NEWS)
- Latest
