Probinsiya sa Sugbo paborito sa mga Taiwanese

CEBU, Philippines — Ang Probinsiya sa Sugbo usa sa top 10 nga popular nga tourist destination nga bisitahon sa mga Taiwanese nga traveler.

Base sa annual report sa  Expedia nga usa ka online travel company ang Sugbo apil ang Kuala Lumpur sa Malaysia maoy pipila sa gustong bisitahon sa mga Taiwanese diin usa sa nakatampo niini nga factors mao ang mga bag-ong budget airline flights sa Pilipinas.

Base sa record sa Provincial Tourism Office ang mga Taiwanese maoy ikaunom sa mga langyaw nga modagsa o mobisita sa Sugbo.

Nagpabilin nga pinakadaghan ang  mga turista gikan sa Korea gisundan sa Japan, China, USA, Australia. Ikaunom ang Taiwan, gisundan sa United Kingdom, Germany, Canada ug Singapore.

Si Joselito “Boboi” Costas, pangulo sa Provincial Tourism Office nagkanayon nga ang maong mga turista mahilig sa mga beach.

“They love the beach more than anything here in Cebu”, matud ni Costas.

Matud ni Costas nga short trip lang ang Taiwan paingon sa Cebu ug gilauman niya nga aduna pay daghang turista ang mangabot diin giingong ang trend karon sa pagbiyahe mao ang shorter distance.

Matod niya nga mahilig na ang mga turista mas gusto mobyahe sa mga destinasyon nga duol ra sa ilang lugar o nasod kon itandi sa mga taas nga byahe. Base sa Expedia ang mga Taiwanese nga mga turista mahilig og bed-and-breakfast accommodation. Gitan-aw kini ni Costas nga maka benepisyo sa mga local business sa Sugbo. (BANAT NEWS)