Armas ug shabu nasakmit

CEBU, Philippines —  Nasikop sa kapolisan ang lima ka gikatahapang pusher nga maoy hinungdan sa pagkasakmit sa pinaketeng shabu nga nagkantidad og P150 mil ug armas sa gipahigayon nga Synchronized Enhnacement Managing Police Operations (SEMPO) sa kapolisan atol sa managlahing takna ug dapit sa Lungsod sa Liloan.

Si PCInsp. Jose Angelo Acupinpin, hepe sa Liloan Police Station maoy nangulo sa gipahigayong operasyon sa Brgy. Poblacion nga maoy hinungdan sa pagkasikop ni Ulysses Tundag.

Gidakop si Tundag pinasikad sa warrant of arrest gumikan sa  kasong murder ug dihang kini girekisa, nakuhaan kini og upat ka dagkung pakete sa gituohang shabu ug 9mm nga pistola nga adunay mga bala.

Giila usab ni PCInsp. Acupinpin ang lain pa nilang dinakpan nga mao sila si Cyrus Luna Benabaye ug Herbert Pareja, nga nadakpan sa buybust operation sa Purok 2, Sitio Dao, Brgy. Cotcot. Nakuhaan sila og pito ka gagmayng pakete sa gituohang shabu ug kalibre 38 nga armas.

Samtang sila si Joserena Andrino ug Rodnery Capuyan nga taga Raysland Subdivision sa Brgy. Tayud ang naaktuhan sa kapolisan nga namaligya og gituohang shabu ug nasakmit gikan kanila ang siyam ka medium sized nga ‘shabu’, kalibre 45 nga pistola ug  kalibre 9mm nga pistol ug mga  bala.

Ang mga dinakpan kasamtangan karong gitanggong sa prisohan sa Liloan Police ug ang mga ebedensiya kasamtangan karong gisumitir sa buhatan sa PNP Crime Labolratory  7 sa pagsiguro nga dili kini mahilabtan.

Sa Dakbayan sa Talisay, nadakpan diha sa Sitio Mananga 2, Barangay Tabunok si Marven Gadiano, 20 ug nakuhaan og 41 ka gagmayng pakete sa gituohang shabu. (BANAT NEWS)