Cyberporn nagpadayon; cellphone na ang gamit

Nagpabilin gihapon nga problema sa Probinsiya sa Sugbo ang pagkatap sa cyberponorgraphy ug human trafficking.

Si bise gobernador Agnes Magpale kinsa moang tsirman sa Provincial Women’s Commission (PWC) miawhag sa mga sakop sa Knights of Columbus sa Lungsod sa Cordova atol sa ilang monthly meeting niadtong Domingo nga motabang sa pagbantay ug report sa mga tawo nga mopahigayon og law-ay nga binuhatan pag-abuso sa mga kababayen-an ug kabatan-onan sa ilang lugar.

Ang bise gobernador miangkon nga naglisod gihapon sila sa pagsulbad niini kay ang mga gikatahapang mihimo niini, mogamit na lang og cellphone aron magpahigayon og cyberpornography.

“In 2008 CPU pa ang gamit, that’s why we were very effective. Pero karon cellphone na lang gyud, sayon na lang itago” matud ni Magpale.

Ang bise gobernador nagpakitabang na sa mga eskwelahan, barangay kapitan ug civic organizations nga motabang sa ilang kampanya batok human trafficking ug cyberpornography.

Sa Cordova, usa ka ginang ang nga adunay 19 ka higayon nga kalapasan sa Republic Act 9208 o Anti-Human Trafficking Law ug R.A 7610 o Anti-child Abuse Law ang nasikop.

Niadtong Disyembre gidakop ang maong ginang ug nagtingkagol karon sa prisohan. (BANAT NEWS)