Chopper crash, fake news—Go

CEBU, Philippines — Gikataw-an lang ug gipadaplin ni kanhi Special Assistant to the President Christopher Lawrence “Bong” Go ang tweet sa giingong anti-Duterte group GovPH (@AltGovPH) nga nag-ingong naapil siya og kahagsa sa chopper sa Air Force didto sa Albay.

Ang maong tweeter post napatik niadtong Enero 5 sa alas 7:51 sa buntag. Gani may pasupot pa kining hulagway sa giingong chopper nga na-crash apan nasuta nga hulagway diay kadto sa crash site niadtong Nobiyembre 22,2018 nga screenshot sa ABS-CBN report.  Apan di siya ang luwan niini kondili si Coop-NATCCO Rep. Anthony Bravo ug mga kaubanan nga nangaangol.

Kusganon kining gihimakak ni Go kinsa namahayag nga kung oras na sa tawo, bisan kinsa pa walay makapakgang niini.

Siya miingon nga andam siyang mamatay alang sa nasud. Gani gihimo hinuong komedya ni Go ang maong tweet pinaagi sa pagtubag niini nga ang kalag niya ang nagsige og tubag sa posts.

Nasayran nga sa miaging semana adlaw nga Biyernes, didto sa Albay si Go kauban si Presidente Rodrigo Duterte naghatud og mga relief goods sa mga biktima sa bagyong Usman ilabi na didto sa Camarines Sur.

Matud pa ni Go kinsa mikandidato pagkasenador sa midterm elections gabaan ra gihapon ang nagsige og mugna og fake news.

Dugang pa niini dili makapugong sa iyang pagserbisyo ang mga susama niini nga mga balita. (BANAT NEWS)