Signal shutdown atol sa Sinulog

CEBU, Philippines — Posible nga ang tibuok isla sa Sugbo ingon man ang mga silingang mga isla sama sa Bohol ug Lapu-Lapu ang maapektuhan unya sa himuong signal shut off atol sa Sinulog 2019.

Gitug-an sa regional director sa National Telecommunication Commission nga si Engr. Jesus Laureno nga mangita gyud og labing duol nga cellsites ang cellphone hinungdan nga aron masiguro nga walay signal sa Sinulog, i-shut-off nila ang tanang cellsites.

"It may be to entire Cebu kay ang ato cellphone, naa capability to roam mangita gyud og nearest cell sites aron makakuha signal... posible pareha sa first time nga shut-off gyud. Mas lapad gyud ang affected," matud ni Laureno.

Ang direktor sa Cebu City Police Office nga si PSSupt. Royina Garma nagkanayon nga ilang gi-request nga pagngon ang mga signal atol sa grand parade ug prosesyon karong Enero 19 ug 20.

"Initially may pagsabot na and we are just doing the formalities. Dili tanan, because we consider businesses for Cebu (if) i-shutdown. Cebu (will be) affected Lapu-Lapu City, Mandaue which we have to consider including parts of Bohol. It's going to be the whole Cebu island maaapektuhan ng shutdown. It’s not going to be whole day, ilang oras lang," butyag niini.

Butyag ni Laureno nga mas maayo kini kon ikumpara sa mga signal jammer nga limitado ra sa 50 ngadto sa 100 ka metros kun asa kini gibutang.

Sa pagkakaron, ila nang gipangandaman ang himuong alternatibong matang sa komunikasyon sa maong mga adlaw.

Dugang ni Garma nga andam na sila sanglit aduna silay dugang nga 100 ka radyo nga magamit atol sa maong okasyon.

Giingong naabot na sab ang 250 ka polis nga gi-augment gikan sa Regional Mobile Force Battalion nga moabag sa seguridad.

Samtang, ang Philippine Drug Enforcement Agency-7 magpakatap og mga K9 units atol sa Sinulog ilabi na ngadto sa mga dagku nga mga party.

Matud ni PDEA-7 director Wardley Getalla nga giatngan na nila nga modaghan ang suplay sa party drugs sa maong okasyon.

Si Konsehal Dave Tumulak, ang Executive Committee Chairman sa Sinulog 2019 nagkanayon nga ang kagamhanan sa Siyudad sa Sugbo mosunod sa unsay mando sa PNP labot sa signal shutdown.

Si Tumulak miingon mohimo sila og kaugalingong communication flow, mangita og alternatibong pamaagi aron maka-communicate sa mga staff sa Sinulog ilabi na ang anaa sa ground. Posible sab nga ang Sinulog Foundation Inc.(SFI) mopalit og handheld radio nga gamiton nila atol sa Sinulog. Suportado sab sa mga opisyal sa Kapitolyo ang signal shutdown.

Si Gobernador Hilario Davide III nakasabot nga alang kini sa seguridad  sa publiko. Nanghinaut lang siya nga adunay handheld radios pagtubag sa mga emerhensiya. Si Bise Gobernador Agnes Magpale nagkanayon nga kinahanglan nga mosunod ang publiko sanglit kamandoan man kini alang sa seguridad. (BANAT NEWS)