Operator sa backhoe, nagpaligis?

CEBU, Philippines — Patay ang usa ka operator sa backhoe human kini naligsan sa iyang gilimpyohan nga backhoe diha sulod sa Capa Quarry Site sa Barangay Guindarohan, Lungsod sa Minglanilla kagahapon sa alas 7:30 sa buntag.

Ang namatay mao si Apolonio Bonghanoy Jr., 38,  taga Sitio Palanas, Barangay Inayagan, Syudad sa Naga.

Ang kapulisan sa Minglanilla nakadawat og tawag labot sa giingong naghikog sa lugar. Apan sa ilang pakisusi naligsan ang biktima sa gimanehong backhoe.

Matud pa ni PO3 Junyl Ater, desk officer sa Minglanilla Police Station nga naglimpyo sa backhoe si Bonghanoy apan paglingi sa truck driver nga si Kevin Pansoy  naligsan na sa backhoe ang operator.

Dali siya nga nagpakitabang hangtud nga niduol si Julito Omandac, kauban sa trabaho ug ilang nakita nga walay nagmaneho sa backhoe nga padayong nitangas sa nakubkob nga yuta.

Usa ka spray bottle ang nakitang nagpatong sa gasolinador ug maoy hinungdan nga nidagan kini bisan walay tawo nga nagmaneho.

Gideklarar nga patay si Bonghanoy ni Dr. Marvin Medina sa Minglanilla District Hospital.

Si Ater miingon nga ang asawa sa namatay nga si Analou Bonghanoy, 38, nitug-an nga may depression ang bana human kini gidakop tungod sa kasong attempted murder ug nakapiyansa niadto lang Disyembre.

Si Ater nagduda nga gituyo ni Bonghanoy ang pagpaligis sa kaugalingon. (BANAT NEWS)