Bukog nakit-an sa nasunogan; Bato nitunol og hinabang

CEBU, Philippines — Usa ka napaig nga bukog sa tawo ang napalgan kagahapon diha sa naabo nga kabalayan sa C.Padilla sa Barangay Duljo-Fatima ning Dakbayan sa Sugbo nga naigo sa sunog niadtong  Sabado sa gabii.

Apan dili pa kasiguro ang kabomberohan kun ang maong bukog iya sa gika-report nga na-missing nga mao si Christian Diaz Lopez niadtong pagkahitabo sa sunog.

Si Leo Jumawan, 21, pag-umangkon ni Lopez maoy nakakita sa maong napaig nga bukog samtang kini nanguykoy sa mga abo sa ilang naugdaw nga panimalay.

Matud niya nakit-an nila ang kilid nga bahin sa bukog nga napaig nga una nilang gituohang iya sa iro apan dihang si Duljo Fatima Barangay Captain Elmer Abella miingon nga ipasaka ang mga bukog nakita nila ang kalabira sa ulo sa tawo.

“Among iro usa raman, nakit-an man namo sa luyo mao to amo nalang gyud gi-klaro, amo nalang gitan-aw niya(Abella). Si Kap Elmer ingon siya isaka niya pagsaka namo naa may ulo(sa tawo),” ni Jumawan pa.

Daghang estorya niadtong Sabado nga nakagawas si Lopez sa kwarto apan wala pa nila karon nakita.

Samtang ai SFO1 Romeo Birao, Cebu City Fire Investigator miingon gipangita gyud nila ang missing person nga gika-report niadtong sabado sa gabii.

Dunay nag-istorya nila nga niadto og simbahan maong ilang gihunong ang pagpangita. Apan kagahapon nakit-an ang maong mga bukog.

“Ang atong gibuhat karon nag-conduct tag additional information regarding the fire incident, nitawag tag taga SOCO para ma-finalize ang report ani(bahin sa bukog),” matud ni SFO1 Birao.

Samtang si Kagawad Milo Arenas, ang Chairperson sa Peace and Order sa maong barangay nga nakahinabi sa Banat News miingon nga karong Enero 9 mahibaw-an kun mahinayon ang reblocking sa dapit. Matud pa niya, 18 ka pamilya, 13 ka balay ang hingpit nga naugdaw ug tulo ang ‘partially burned’ nga balay nga miigo niadtong Sabado sa gabii.

Ang barangay nakahatud na og hinabang sa mga nasunogan samtang si Bise Mayor Edgardo Labella mipadayag nga ang siyudad mohatag usab og hinabang sa mga biktima.

Sa pikas bahin, gidad-an kagahapon og mga hinabang ni kanhi PNP Chief Ronald “Bato” Dela Rosa ang mga nasunogan sa maong gihapong barangay niadtong Disyembre 25 sa kaadlawon ug mga biktima sa sunog niadtong Sabado sa gabii diha sa ilang temporaryong gipasilongan sa barangay basketball court.

Si Dela Rosa kinsa kandidato pagka-senador giabibahan dayon sa mga tawo sa iyang pagabot.

Bisan pa man sa kakulian sa sound systems, nalingaw ni Dela Rosa ang mga tawo pinaagi sa iyang  pagawit sa popular nga kantang “You are the reason” nga gipasikat ni Calum Scott.

Human sa ceremonial turnover sa mga hinabang mibiya na dayon si Dela Rosa. Nichole, USJR Intern (BANAT NEWS)