Duha nga hapit nang ma-HVT sikop
CEBU, Philippines — Duha ka lalaki nga giingong hapit na ‘makandidato’ pagka High Value Target (HVT) gumikan sa negusyo sa ilegal nga drugas ang nadakpan kapolisan sa Siyudad sa Talisay sa Sitio Candaya, Barangay Linao niadtong Sabado sa alas 3:50 sa hapon.
Ang mga nasikop mao sila si Armando Villavelez, 54-anyos ug si Gerald Geraldizo, 42-anyos, pulos nagpuyo sa maong dapit.
Si PSupt. Marlu Conag, hepe sa Talisay City Police Station miingon nga ang paghatag og impormasyon sa katawhan diha kanila maoy dakung tabang sa pagkasikop sa duha ka durugista.
Gihimo ang buybust operation nga gipanguluhan ni PCInsp. Ardeolito Cabagnot ug wala na makaipsot ang duha.
Nakuhaan og upat ka medium nga pakete ug 73 ka gagmayng pakete sa gituohang shabu ang mga dinakpan. Aduna kini timbang nga 19.65 gramos ug mobalor sa P133, 620. Gawas sa drugas, nakumpiska sab ang duha ka kalibre .45 nga pistol nga adunay upat ka bala.
Matud pa ni Cunag nga nahurot-hurot na ang ilang giila nga HVT apan ang duha nila nga nasikop mao sab ni ang mokandidato pagka HVT kun wala pa dayon nila masikop.
Dugang sa hepe nga posibleng manukol ang mga nasikop kon nakahigayon pa hinungdan nga dili gyud sila mokumpyansa.
Ang mga dinakpan gibalhug na sa bilangguan samtang nagpaabot nga pasakaan og kaso karong adlawa. (BANAT NEWS)
- Latest
